పిల్ల భవిష్యత్ కోసం పరీక్షలు పెడతామని ఏపీ ప్రభుత్వం చెబుతుంది. ఎట్టి పరిస్థితుల్లోనూ పరీక్షలు నిర్వహిస్తామని విద్యాశాఖ మంత్రి ఆదిమూలపు సురేష్ చెబుతున్నారు. అయితే కరోనా నేపథ్యంలో కేంద్ర ప్రభుత్వం 10, 12వ తరగతి పరీక్షలని రద్దు చేసింది. అలాగే దేశంలో ఇతర రాష్ట్రాలు సైతం ఇదే పని చేశాయి. పక్కనే ఉన్న తెలంగాణలో సైతం టెన్త్, ఇంటర్ పరీక్షలు రద్దు చేసి, విద్యార్ధులని నేరుగా పాస్ చేసింది. కానీ ఏపీ ప్రభుత్వం పరీక్షల విషయంలో గట్టిగా నిలబడుతుంది.

కానీ పరీక్షలు రద్దు చేయాలని నారా లోకేష్ గట్టిగా డిమాండ్ చేస్తున్నారు. ఈ విషయంపై విద్యార్ధులతో ఆన్‌లైన్‌లో సమావేశమై, పరీక్షలపై వారి ఒపీనియన్ తెలుసుకుంటున్నారు. అటు విద్యార్ధుల తల్లిదండ్రులతో కూడా లోకేష్ మాట్లాడుతున్నారు. ఇక విద్యార్ధులు కూడా పరీక్షలు రద్దు చేస్తేనే బాగుంటుందనే ఉద్దేశంతో ఉన్నారు. ఒకవేళ పరీక్షలు రద్దు చేయాలనే డిమాండ్ విషయంలో లోకేష్ గట్టిగా నిలబడకపోతే, ఏపీ ప్రభుత్వం పరీక్షలు రద్దు చేసేదేమో అని పలువురు రాజకీయ పరిశీలకులు అభిప్రాయపడుతున్నారు.

లోకేష్ ఈ విషయంలో కలుగజేసుకోవడం వల్ల, ఏపీ ప్రభుత్వం పట్టుదలతో పరీక్షలు పెడుతున్నట్లు కనిపిస్తుందని అంటున్నారు. ఇలాంటి సమయంలో పరీక్షలు రద్దు చేస్తే, ఆ క్రెడిట్ లోకేష్‌కు వెళుతుందనే ఉద్దేశంతో ప్రభుత్వం పరీక్షల నిర్వహణకు మొగ్గుచూపి ఉండొచ్చని చెబుతున్నారు.

కేంద్రంతో పలు రాష్ట్రాలు పరీక్షలని రద్దు చేసి, విద్యార్ధులకు ఊరటనిచ్చిన, జగన్ ప్రభుత్వం అలా చేయడం లేదు. పైగా పరీక్షలని వాయిదా వేసింది. ఇలా వాయిదా వేసి పరీక్షలు నిర్వహించడం వల్ల, విద్యార్ధులకు నెక్స్ట్ విద్యా సంవత్సరం ఆలస్యమైపోతుందని అంటున్నారు. మరి లోకేష్ విద్యార్ధులని వదిలేస్తే, వైసీపీ ప్రభుత్వం పరీక్షలని రద్దు చేసేందుకు మొగ్గు చూపుతుందేమో అని పరిశీలకులు భావిస్తున్నారు.