ఇంకా అధికార బలంతో చాలాచోట్ల టీడీపీ ఎమ్మెల్యేలకు చెక్ పెట్టేశారు. ఈ క్రమంలోనే విశాఖ తూర్పులో గెలిచిన వెలగపూడి రామకృష్ణకు సైతం జగన్ చెక్ పెట్టేశారని చెప్పొచ్చు. మామూలుగా తూర్పులో వెలగపూడి చాలా స్ట్రాంగ్‌గా ఉన్నారు. 2009, 2014, 2019 ఎన్నికల్లో వరుసగా టీడీపీ తరుపున గెలిచి హ్యాట్రిక్ కొట్టారు. అయితే ఇలా హ్యాట్రిక్ కొట్టి బలంగా ఉన్న వెలగపూడిని విజయసాయిరెడ్డి గట్టిగా టార్గెట్ చేశారు. ఆయనపై అనేక అవినీతి ఆరోపణలు చేస్తూ వచ్చారు.

వంగవీటి రంగా హత్య కేసులో వెలగపూడి కూడా ఒక ముద్దాయి అని పలుమార్లు విమర్శలు చేశారు. రంగాని చంపి విజయవాడ నుంచి పారిపోయి, వైజాగ్‌కు వచ్చారని ఆరోపించారు. అలాగే గతంలో టీడీపీ అధికారంలో ఉన్నప్పుడు వెలగపూడి అనేక భూ కబ్జాలకు పాల్పడ్డారని ఆరోపణలు గుప్పించారు. ఇక మూడు రాజధానుల్లో భాగంగా విశాఖ పరిపాలన రాజధాని కానున్న సంగతి తెలిసిందే. కానీ మూడు రాజధానులకు టీడీపీ వ్యతిరేకంగా ఉంది. అమరావతికి మద్ధతు ఇస్తుంది.

అయితే విశాఖ ఎమ్మెల్యేగా ఉన్న వెలగపూడి సైతం అమరావతికి మద్ధతు తెలపడంతో నియోజకవర్గంలోని వైసీపీ శ్రేణులు వెలగపూడిని టార్గెట్ చేశాయి. చాలారోజులు వెలగపూడి ఇంటివద్ద వైసీపీ శ్రేణులు హడావిడి చేశాయి. రాజకీయంగా ఆయన్ని ఇబ్బంది పెట్టడమే లక్ష్యంగా పనిచేశాయి. ఇలా వైసీపీ, వెలగపూడిని ఎన్ని రకాలుగా టార్గెట్ చేయాలో అన్నీ రకాలుగా టార్గెట్ చేసింది. ఫలితంగా తూర్పులో వెలగపూడి వీక్ అయ్యారు. ఇటీవల విశాఖ కార్పొరేషన్ ఎన్నికల్లో, తూర్పు పరిధిలో ఉన్న డివిజన్లలో వైసీపీ సత్తా చాటింది. ఇక నెక్స్ట్ ఎన్నికల్లో కూడా వెలగపూడికి చెక్ పెట్టడమే లక్ష్యంగా వైసీపీ ముందుకెళుతుంది.