అయితే పేదలకు ఉచితంగా ఆహారం అందిస్తున్న శివశక్తి ఫౌండేషన్ మాజీ ఎమ్మెల్యే, టీడీపీ నేత జీవీ ఆంజనేయులుకు సంబంధించింది. అందుకే ఎమ్మెల్యే ఆ సంస్థకు బ్రేక్ వేసినట్లు తెలుస్తోంది. అయితే శివశక్తికి డబ్బులు ఎక్కడ వస్తున్నాయని ఎమ్మెల్యే ప్రశ్నిస్తున్నారు. ఇక ఎమ్మెల్యేకు ధీటుగా జీవీ కూడా స్పందిస్తూ, వినుకొండ ప్రజలకు 23 ఏళ్లుగా సేవలందిస్తున్న శివశక్తి ఫౌండేషన్‌పై ఆరోపణలు నిరూపించాలని, కావాలంటే దేవుడు మీద ప్రమాణం చేయడానికి రావాలని జీవీ సవాల్ కూడా విసిరారు.

ఈ క్రమంలోనే దేవుడు మీద ప్రమాణం చేయడానికి వెళుతున్న జీవీని పోలీసులు ఆపేశారు. ఇక శివశక్తి పౌండేషన్ బ్యాలెన్స్ షీట్లు బయటపెట్టాలని ఎమ్మెల్యే డిమాండ్ చేస్తున్నారు. శివశక్తికి ఎక్కడ నుంచి నిధులు వస్తున్నాయో లెక్కలు చూపకుండా ప్రమాణాలు ఎందుకు చేస్తున్నారని ప్రశ్నించారు. ఆంజనేయులుది అంతా తొండి వ్యవహారమని ఎమ్మెల్యే మండిపడుతున్నారు.

అసలు కోవిడ్ రోగులకు సేవ చేస్తున్న శివ శక్తి ఫౌండేషన్ పై ఎమ్మెల్యే తీరు దుర్మార్గమని, అధికారులు బంట్రోతుల్లా పని చేయడం మానుకోవాలని టీడీపీ నేత నక్కా ఆనందబాబు మండిపడుతున్నారు. ఈ విధంగా వినుకొండలో వైసీపీ-టీడీపీలు రాజకీయ రచ్చ లేపుతున్నాయి. కాకపోతే ప్రజలకు ఉచితంగా ఆహారం అందించే కార్యక్రమం అడ్డుకోవడం కరెక్ట్ కాదని న్యూట్రల్ వ్యక్తులు అభిప్రాయ పడుతున్నారు. శివశక్తి ఏమన్నా తప్పు చేస్తే, విచారణ చేసి తగిన చర్యలు తీసుకోవాలని చెబుతున్నారు. ఏదేమైనా వినుకొండలో రెండు పార్టీలు రాజకీయం చేస్తున్నట్లే కనిపిస్తోంది.