కడప ఎమ్మెల్యేగా గెలిచిన అంజాద్ బాషాకు మైనారిటీ సంక్షేమ శాఖతో పాటు డిప్యూటీ సీఎం పదవి ఇచ్చారు. అలాగే రాయచోటి ఎమ్మెల్యే శ్రీకాంత్ రెడ్డికి ప్రభుత్వ చీఫ్‌విప్ ఇచ్చారు. ఇలా కీలక పదవులు ఉండటంతో కడప జిల్లాకు మరో పదవి దక్కలేదు. సీఎం, డిప్యూటీ సీఎం, ప్రభుత్వ చీఫ్‌విప్‌లు కడప జిల్లా నుంచే ఉన్నారు కాబట్టి, నెక్స్ట్ మంత్రివర్గ విస్తరణలో మరో అవకాశం దక్కేలా కనిపించడం లేదు.

కాకపోతే జగన్ ఒకేసారి 25 మందితో మంత్రివర్గాన్ని ఏర్పాటు చేసుకుని పాలన మొదలుపెట్టారు. అయితే అప్పుడే మంత్రిగా ఛాన్స్ రానివారికి నెక్స్ట్ రెండున్నర ఏళ్లలో మంత్రివర్గంలో మార్పులు చేసి అవకాశం ఇస్తానని చెప్పారు. జగన్ అధికారంలోకి వచ్చి రెండేళ్ళు అయిపోతుంది. ఇంకో ఆరు నెలల్లో మంత్రివర్గంలో మార్పులు చేసే అవకాశముంది. ఇక అప్పుడు జగన్ పనితీరు బాగోని మంత్రులని పక్కనబెట్టేసి కొత్తవారికి అవకాశం కల్పించవచ్చు.

ఒకవేళ పనితీరు ఆధారంగా కాకపోయినా సరే జిల్లాలు, కులాలు ఆధారంగా మంత్రివర్గంలో మార్పులు చేయొచ్చు. ఇక అప్పుడు కడప జిల్లాలో ఏమన్నా మార్పులు రావొచ్చు. అలాగే కొత్తవారికి కేబినెట్‌లో అవకాశం కల్పించవచ్చు. లేదంటే జిల్లాకు మరో మంత్రి పదవి అదనంగా ఇవ్వొచ్చు. మరి కడప జిల్లా విషయంలో జగన్ ఎలాంటి నిర్ణయం తీసుకుంటారో చూడాలి. జిల్లాకు మరొక ఆఫర్ ఇస్తారా లేదా అంతటితో ఆపేస్తారో?