ముఖ్యంగా విశాఖపట్నం జిల్లాలో టీడీపీకి సరైన నాయకుడు కనిపించడం లేదు. జిల్లాలో మూడు పార్లమెంట్ స్థానాలు ఉన్నాయి. విశాఖపట్నం, అనకాపల్లి, అరకు స్థానాలు ఉన్నాయి. గత ఎన్నికల్లో మూడుచోట్ల టీడీపీ ఓడిపోయింది. విశాఖలో బాలకృష్ణ చిన్నల్లుడు శ్రీభరత్ టీడీపీ తరుపున పోటీ చేసి స్వల్ప మెజారిటీతో ఓడిపోయారు. అయితే ఓడిపోయాక భరత్ పార్టీ తరుపున యాక్టివ్‌గానే పనిచేశారు. మొన్న కార్పొరేషన్ ఎన్నికల ముందు వరకు పార్టీలో కనిపించారు. అయితే విశాఖ కార్పొరేషన్‌లో వైసీపీ గెలిచింది. ఇక ఎన్నికల ఫలితం తర్వాత భరత్ సైలెంట్ అయిపోయారు.

అటు అనకాపల్లి పార్లమెంట్ స్థానంలో టీడీపీకి నాయకుడే లేరు. గత ఎన్నికల్లో ఇక్కడ నుంచి ఆడారి ఆనంద్ టీడీపీ తరుపున పోటీ చేసి ఓడిపోయారు. ఓడిపోయాక ఆనంద్ వైసీపీలోకి వెళ్ళిపోయారు. ఆనంద్ వెళ్ళాక, మరో నాయకుడుని పెట్టలేదు. కాకపోతే అనకాపల్లి పార్లమెంట్ అధ్యక్షుడుగా బుద్ధా నాగజగదీశ్వరరావు పనిచేస్తున్నారు.

ఇక అరకు స్థానంలో టీడీపీ ఉనికే కోల్పోయేలా ఉంది. గత ఎన్నికల్లో ఇక్కడ నుంచి కేంద్ర మాజీ మంత్రి కిషోర్ చంద్రదేవ్ పోటీ చేసి ఓడిపోయారు. కాంగ్రెస్‌లో కీలకంగా పనిచేసిన కిషోర్ 2019 ఎన్నికల ముందు టీడీపీలోకి వచ్చి, అరకులో పోటీ చేసి ఓటమి పాలయ్యారు. ఓడిపోయాక కిషోర్ రాజకీయాల్లోనే కనిపించడం లేదు. కిషోర్ స్థానంలో మరో నాయకుడుని ఇన్‌చార్జ్‌గా పెట్టలేదు. కానీ అరకు పార్లమెంట్ అధ్యక్షురాలుగా గుమ్మడి సంధ్యారాణి ఉన్నారు. ఈమె 2014లో అరకు నుంచి పోటీ చేసి ఓడిపోయారు. నెక్స్ట్ ఎన్నికల్లో ఈమె టీడీపీ తరుపున బరిలో ఉండొచ్చు.