చంద్రబాబు అనేక ప్రలోభాలకు గురిచేసి వైసీపీ ఎమ్మెల్యేలని తీసుకున్నారు. అయితే అధికారం ఉందని ఎమ్మెల్యేలు జంప్ అయిపోయారు. ఇక అధికారం ఉన్నన్ని రోజులు బాగానే గడిపారు. కానీ 2019 ఎన్నికల్లోనే అసలు సినిమా కనపడింది. అయితే టీడీపీలో మళ్ళీ టిక్కెట్ దక్కదని తెలిసిన కొందరు ఎమ్మెల్యేలు, మళ్ళీ వైసీపీలోకి వచ్చేశారు. వైసీపీలో టిక్కెట్ దక్కకపోయినా సైలెంట్‌గా ఉండిపోయారు.

ఇక టీడీపీ తరుపున పోటీ చేసిన మిగిలిన ఎమ్మెల్యేలు ఘోరంగా ఓడిపోయారు. అయితే అందులో ఒక్క గొట్టిపాటి రవికుమార్ మాత్రం మళ్ళీ అద్దంకి నుంచి గెలిచారు. మిగిలిన నాయకులు దారుణంగా ఓడిపోయారు. ఇక ఓడిపోయాక చాలామంది నాయకులు సైలెంట్ అయిపోయారు. అయితే కొందరు నాయకులు మళ్ళీ వైసీపీలోకి వెళ్లడానికి ప్రయత్నాలు చేశారు. కానీ తనని మోసం చేసి వెళ్ళిన వారిని జగన్ తిరిగి ఆహ్వానించడానికి సిద్ధంగా లేరని తెలిసింది. దాంతో ఆ నాయకులు టీడీపీలోనే సైలెంట్‌గా ఉన్నారు. ఇక ఆదినారాయణరెడ్డి లాంటి వారు బీజేపీలోకి వెళ్లారు.

అలా సైలెంట్‌గా ఉన్న నాయకులు ఇప్పుడు బాధపడుతున్నట్లు తెలుస్తోంది. ఒకవేళ జగన్‌తో ఉంటే మంచి మంచి పదవులు వచ్చేవని, పదవులు రాకపోయినా కనీసం ఎమ్మెల్యేలుగా గెలిచి అధికారంలో ఉండేవారమని అనుకుంటున్నారట. వాస్తవానికి ఇప్పుడు టీడీపీలోనే ఉండిపోయిన కొందరు సీనియర్ నాయకులు వైసీపీని వీడకుండా ఉంటే మళ్ళీ గెలిచి మంత్రులుగా కూడా పనిచేసేవారు. కానీ అప్పుడు అధికారం కోసం ఆశపడి జగన్‌ని వదిలేసి, టీడీపీలోకి వచ్చి ఇప్పుడు నానా ఇబ్బందులు పడుతున్నారనే చెప్పొచ్చు. మొత్తానికైతే జగన్‌ని వదలడం ఆ జంపింగ్ నేతల రాజకీయ భవిష్యత్ దెబ్బతిందనే చెప్పొచ్చు.