టీడీపీ తరుపున అద్దంకి నియోజకవర్గం నుంచి పోటీ చేసి వెంకటేష్ ఓటమి పాలయ్యారు. అప్పుడు వైసీపీ తరుపున పోటీ చేసిన గొట్టిపాటి రవికుమార్ విజయం సాధించారు. అయితే తర్వాత గొట్టిపాటి టీడీపీలోకి వచ్చేయడంతో అసలు సమస్య మొదలైంది. ఒకే పార్టీలో ఉన్నా సరే  కరణం, గొట్టిపాటిలకు సరిగ్గా పడేది కాదు. వీరి మధ్య చాలాసార్లు రచ్చ జరిగింది. పలుసార్లు చంద్రబాబు, వీరి పంచాయితీని పరిష్కరించడానికి చూశారుగానీ పెద్దగా వర్కౌట్ కాలేదు.

చివరికి కరణం బలరాంకు 2019 ఎన్నికల్లో చీరాల టిక్కెట్ ఇచ్చారు. ఇటు అద్దంకిలో గొట్టిపాటి పోటీ చేశారు. జగన్ వేవ్ ఉన్నా సరే ఈ ఇద్దరు టీడీపీ తరుపున గెలిచారు. ఇక మధ్యలో కరణం, తన కుమారుడుతో కలిసి వైసీపీ వైపుకు వెళ్లారు. ఇలా వైసీపీలోకి వెళ్ళాక చీరాలలో ఉన్న మాజీ ఎమ్మెల్యే ఆమంచి కృష్ణమోహన్‌తో విభేదాలు మొదలయ్యాయి. గత కొంతకాలంగా కరణం, ఆమంచి వర్గాల మధ్య రచ్చ జరుగుతూనే ఉంది.

అదే సమయంలో అద్దంకి నియోజకవర్గంలో కరణం వర్గం హడావిడి ఉంటూనే ఉంది. దీంతో అక్కడ ఉండే వైసీపీ ఇన్‌చార్జ్ బాచిన చైతన్యతో, కరణం వర్గానికి పడటం లేదు. ఇలా రెండుచోట్ల కరణం వర్గం విభేదాలు పెట్టుకుని ముందుకు నడుస్తుంది. అయితే వచ్చే ఎన్నికల్లో కరణం పరిస్తితి పక్కనబెడితే, ఆయన వారసుడుకి టిక్కెట్ దొరుకుతుందా లేదా అనేది తెలియడం లేదు. కాకపోతే ప్రకాశం జిల్లాలో కరణంకు బలం బాగానే ఉంది. కాబట్టి జగన్, కరణం ఫ్యామిలీని పక్కనబెట్టడం అయితే జరగదు. మరి చూడాలి నెక్స్ట్ కరణం వారసుడుకు ఛాన్స్ ఉంటుందేమో.