అసలు మండపేటలో ఎమ్మెల్యే వేగుళ్ళ జోగేశ్వరరావు చాలా స్ట్రాంగ్‌గా ఉంటారు. 2009,2014, 2019 ఎన్నికల్లో కూడా వరుసగా గెలిచి హ్యాట్రిక్ కొట్టారు. మూడోసారి ఎమ్మెల్యేగా గెలిచిన వేగుళ్ళ...ప్రజలకు నిత్యం అందుబాటులోనే ఉంటున్నారు. వారికి ఎలాంటి సమస్యలు ఉన్న, పరిష్కరించడంలో ముందున్నారు.

అయితే 2019 ఎన్నికల్లో మండపేటలో వేగుళ్ళ మీద పిల్లి సుబాష్ చంద్రబోస్ పోటీ చేసి ఓడిపోయారు. దీంతో జగన్, ఆయనకు ఎమ్మెల్సీ ఇచ్చి, మంత్రిని చేశారు. మధ్యలో మండలి రద్దు అంశం రావడంతో పిల్లి ఎమ్మెల్సీ, మంత్రి పదవులని వదులుకోవాల్సి వచ్చింది. అలాగే జగన్, ఆయనకు రాజ్యసభ ఇచ్చారు. దీంతో మండపేట బాధ్యతలు టీడీపీ నుంచి వచ్చిన తోట త్రిమూర్తులుకు అప్పగించారు. 2019 ఎన్నికల్లో తోట టీడీపీ తరుపున రామచంద్రాపురం నుంచి పోటీ చేసి ఓటమి పాలయ్యారు. ఓడిపోయాక వైసీపీలోకి వచ్చేశారు.

పార్టీలోకి వచ్చాక జగన్, తోటకు మండపేట బాధ్యతలు అప్పగించారు. ఇక అక్కడ నుంచి మండపేటలో వైసీపీ బలోపేతానికి తోట కృషి చేస్తూ వచ్చారు. అధికారంలో ఉండటంతో టీడీపీకు ఉన్న బలమైన కేడర్‌ని తనవైపు తిప్పుకున్నారు. అలాగే నియోజకవర్గంలో ఉన్న కాపు నాయకులని వైసీపీలోకి తీసుకొచ్చారు. ఇలా ఎక్కడికక్కడ వైసీపీని స్ట్రాంగ్ చేస్తూ వచ్చారు. దీంతో పంచాయితీ, మున్సిపల్ ఎన్నికల్లో మండపేటలో వైసీపీ జెండా ఎగిరింది.

కాంగ్రెస్ హయాంలో వైఎస్సార్ సీఎంగా ఉన్నప్పుడే మండపేట మున్సిపాలిటీలో టీడీపీ గెలిచింది. అప్పుడు వేగుళ్ళనే ఛైర్మన్. కానీ ఇప్పుడు వేగుళ్ళ ఎమ్మెల్యేగా ఉండి, మండపేట మున్సిపాలిటీని గెలిపించలేకపోయారు. ఇక దీని బట్టి చూసుకుంటే మండపేటలో త్రిమూర్తులు, వేగుళ్ళకు చెక్ పెట్టినట్లే అనుకోవచ్చు.