అయితే 2009 ఎన్నికల నుంచి అద్దంకి కాస్త గొట్టిపాటి రవికుమార్ అడ్డాగా మారిపోయిందనే చెప్పుకోవచ్చు. 2009లో కాంగ్రెస్ నుంచి తొలిసారి బరిలో దిగిన గొట్టిపాటి..అప్పుడు టీడీపీ అభ్యర్ధి కరణం బలరాంపై విజయం సాధించారు. తర్వాత కాంగ్రెస్ పార్టీ కనుమరుగవడంతో వైసీపీలోకి వచ్చి, 2014 ఎన్నికల్లో వైసీపీ అభ్యర్ధిగా బరిలో దిగి టీడీపీ నుంచి పోటీ చేసిన కరణం తనయుడు వెంకటేష్‌పై స్వల్ప మెజారిటీతో గెలిచారు.

అయితే అధికారం టీడీపీకి దక్కడంతో ఆయన పసుపు కండువా కప్పేసుకున్నారు. పార్టీలోకి వచ్చిన కొన్నాళ్లు కరణం ఫ్యామిలీతో విభేదాలు అలాగే కొనసాగిన, 2019 ఎన్నికల్లో కరణం బలరాంకు చీరాల టికెట్ ఇవ్వడంతో, గొట్టిపాటికి ఇబ్బందులు తప్పాయి. 2019 ఎన్నికల్లో కూడా అద్దంకి నుంచి టీడీపీ తరుపున పోటీ చేసి గెలిచారు.

రాష్ట్రమంతా జగన్ గాలి ఉన్న, తనతో పాటు పార్టీ మారిన వారు ఓడిపోయిన, గొట్టిపాటి మాత్రం గెలుపు గుర్రం ఎక్కగలిగారు. అయితే ఈసారి అధికారం వైసీపీ చేతుల్లోకి వెళ్లడంతో గొట్టిపాటికి ఇబ్బందులు మొదలయ్యాయి. ఆయన్ని వైసీపీలోకి తీసుకొచ్చేందుకు గట్టి ప్రయత్నాలే జరిగాయని వార్తలు కూడా వచ్చాయి. పైగా ఆయన గ్రానైట్ వ్యాపారంపై విజిలెన్స్ దాడులు జరగడంతో, పార్టీ మారడం ఖాయమైపోయిందని ప్రచారం జరిగింది.

ఎంత ప్రచారం జరిగిన గొట్టిపాటి మాత్రం టీడీపీని వీడలేదు. అవన్నీ వదిలేసి నియోజకవర్గంలో పనులు చేసుకుంటున్నారు. ప్రతిపక్ష ఎమ్మెల్యేగా నిధులు అందకపోయిన, నిత్యం జనాలకు అందుబాటులో ఉంటున్నారు. అయితే గొట్టిపాటి అధికార వైసీపీ మీద అసలు విమర్శలు చేసిన సందర్భాలు లేవు. ఏం మాట్లాడితే, ఏం చిక్కులు వస్తాయనో ఏమో గానీ సైలెంట్ గానే ఉంటున్నారు.

ఇక ఇక్కడ వైసీపీ తరుపున బాచిన చైతన్య పనిచేస్తున్నారు. గొట్టిపాటిని ఢీకొడుతూ చైతన్య అద్దంకిలో వైసీపీని బలోపేతం చేస్తున్నారు. ఇటీవల పంచాయితీ ఎన్నికల్లో వైసీపీ సత్తా చాటింది. అటు అద్దంకి మున్సిపాలిటీలో కూడా వైసీపీ జెండా ఎగిరింది. అయితే అధికారంలో ఉండటం వల్లే వైసీపీ ఈ స్థాయిలో విజయం సాధించగలిగిందని చెప్పొచ్చు. ప్రతిపక్షంలో ఉన్నా సరే గొట్టిపాటి వైసీపీకి ధీటుగా టీడీపీని నిలబెట్టారు.

అసలు పోటీలో ఉండటమే కష్టం అనుకుంటే, పంచాయితీ, అద్దంకి మున్సిపాలిటీలో అభ్యర్ధులని నిలబెట్టారు. అలాగే చెప్పుకోదగిన విధంగా పంచాయితీలు గెలిపించారు. అటు అద్దంకి మున్సిపాలిటీలో 19 వార్డులు ఉంటే, వైసీపీ 13 గెలుచుకోగా, టీడీపీ 6 గెలుచుకుంది. అయితే అంతటి వైసీపీ వేవ్‌లో 6 వార్డులు గెలుచుకోవడం మామూలు విషయం కాదు. ఏదేమైనా అద్దంకిలో గొట్టిపాటి కాస్త బలంగానే ఉన్నారని చెప్పొచ్చు.