అలా ఎన్నికలైన దగ్గర నుంచి సైలెంట్ అయిపోయిన నాయకుల్లో కే‌ఈ కృష్ణమూర్తి కూడా ఉన్నారు. ఏపీ రాజకీయాల్లో కే‌ఈ చాలా సీనియర్ నాయకుడు. దశాబ్దాల పాటు టీడీపీకి సేవలు అందిస్తున్న కృషమూర్తి, గత చంద్రబాబు ప్రభుత్వంలో డిప్యూటీ సీఎంగా పనిచేశారు. అయితే వయసు మీద పడటంతో 2019 ఎన్నికల్లో పోటీలో దిగకుండా తన తనయుడు శ్యామ్‌ని పోటీలో దించారు. పత్తికొండలో పోటీ చేసిన శ్యామ్ జగన్ వేవ్‌లో ఘోరంగా ఓడిపోయారు.

అటు కే‌ఈ సోదరుడు ప్రతాప్ సైతం డోన్ నియోజకవర్గంలో ఓటమి పాలయ్యారు. ఇలా ఓడిపోయిన తర్వాత కే‌ఈ ఫ్యామిలీ రాజకీయాల్లో యాక్టివ్‌గా లేకుండా పోయింది. అదే సమయంలో కే‌ఈ మరో సోదరుడు ప్రభాకర్ సైతం టీడీపీకి దూరం జరిగారు. ఎమ్మెల్సీగా ఉన్న ప్రభాకర్ పార్టీకి కొన్ని రోజులు దూరమయ్యారు. అయితే కే‌ఈ ఫ్యామిలీపై వరుసగా కేసులు వచ్చి పడుతుండటంతో, డోన్ బాధ్యతల నుంచి ప్రతాప్ తప్పుకున్నారు. ఇదే సమయంలో ప్రభాకర్‌కు డోన్ బాధ్యతలు అప్పగించారు.

ఇటు పత్తికొండ ఇన్‌చార్జ్‌గా శ్యామ్ ఉన్నారు. అయితే పేరుకే ఇన్‌చార్జ్‌లుగా ఉన్నారు గానీ, పూర్తి స్థాయిలో పార్టీనీ నిలబెట్టే ప్రయత్నాలు చేయడం లేదు. ఇంతవరకు నియోజకవర్గాల్లో పెద్దగా కనిపించిన సందర్భాలు కూడా లేవు. అటు కృష్ణమూర్తి సైతం వయసు మీద పడటంతో ఇంటికే పరిమితమయ్యారు. ప్రస్తుతానికైతే కర్నూలు జిల్లాలో కే‌ఈ ఫ్యామిలీ సైలెంట్‌గా ఉంది. మరి కే‌ఈ ఫ్యామిలీ రాజకీయాల్లో యాక్టివ్ అయ్యి ఎప్పుడు సైకిల్ తొక్కుతారో చూడాలి.