ఈయన మీడియా సమావేశం పెడితే చాలు ప్రత్యర్ధులు కంగారు పడాల్సిందే. ముఖ్యంగా ప్రతిపక్ష టీడీపీ నాయకులకు కొడాలి నాని చుక్కలు చూపిస్తుంటారు. తమ ప్రభుత్వంపై గానీ, తమ సీఎం జగన్‌పైన గానీ టీడీపీ నాయకులు విమర్శలు చేస్తే, వెంటనే రంగంలోకి దిగేసి కౌంటర్లు ఇచ్చేస్తారు. ఏ మాత్రం మొహమాటం లేకుండా పరుష పదజాలం సైతం వాడుతూ, చంద్రబాబు అండ్ బ్యాచ్‌పై విరుచుకుపడతారు. ఇలా టీడీపీకి నాని చెక్ పెడుతూ, ఈ రెండేళ్లలో బాగా హైలైట్ అయ్యారు.

అయితే ఈయన స్థాయిలో కృష్ణా జిల్లాలో మరో వైసీపీ నాయకుడు హైలైట్ కాలేదు. కాకపోతే కొడాలి నాని తర్వాత, మంత్రి పేర్ని నాని సైతం బాగానే హైలైట్ అయ్యారు. ఈయన కూడా తనదైన శైలిలో వెటకారంగా మాట్లాడుతూ, ప్రతిపక్ష టీడీపీకి చెక్ పెడతారు. ఇలా ఈ ఇద్దరు మంత్రులు కృష్ణా జిల్లా రాజకీయాల్లోనే బాగా హాట్ టాపిక్ అవుతున్నారు. వీరి మధ్యలో మరో వైసీపీ నాయకుడు పెద్దగా హైలైట్ అయిన సందర్భాలు లేవు.

జిల్లాలో వైసీపీ తరుపున 15 మంది ఎమ్మెల్యేలు, ఒక ఎంపీ ఉన్నారు. ఇందులో కొడాలి నాని, పేర్ని నానీని పక్కనబెడితే, వేరే వైసీపీ ఎమ్మెల్యే పెద్దగా పోలిటికల్ స్క్రీన్‌పై సందడి చేయలేదు. అయితే మంత్రి వెల్లంపల్లి శ్రీనివాస్ విజయవాడ రాజకీయాల వరకు బాగానే కనిపిస్తున్నారు. మొత్తానికైతే కృష్ణాలో కొడాలి హవా ఎక్కువ ఉందని చెప్పొచ్చు.