ఇక ఎన్నికల అయిన దగ్గర నుంచి జిల్లాలో మరింతగా వైసీపీకి అనుకూలంగా పరిస్థితులు మారిపోయాయి. రాజధాని అమరావతి అంశం కూడా వైసీపీని ఇబ్బంది పెట్టలేదు. ఊహించని విధంగా స్థానిక సంస్థల ఎన్నికల్లో వైసీపీ సత్తా చాటిన విషయం తెలిసిందే. అలాగే గుంటూరు కార్పొరేషన్‌లో వైసీపీ జెండా ఎగిరింది. ఈ విధంగా జిల్లాపై వైసీపీకి పూర్తి పట్టు వచ్చింది.

ఆఖరికి టీడీపీ గెలిచిన అసెంబ్లీ స్థానాల్లో సైతం వైసీపీ పట్టు సాధించింది. టీడీపీ గెలిచిన రేపల్లె, గుంటూరు వెస్ట్‌ల్లో వైసీపీ హవా నడిచింది. ఇప్పటికే వెస్ట్ ఎమ్మెల్యే మద్దాలి గిరి వైసీపీ ప్రభుత్వానికి మద్ధతు తెలిపిన విషయం తెలిసిందే. అనధికారికంగా గిరి వైసీపీ ఎమ్మెల్యేగా కొనసాగుతున్నారు. అయితే నెక్స్ట్ ఎన్నికల్లో వెస్ట్ వైసీపీ సీటు గిరికే దక్కుతుందా? అనేది ఇంకా కన్ఫామ్ కాలేదు. గత ఎన్నికల్లో వైసీపీ నుంచి ఓడిపోయిన చంద్రగిరి యేసురత్నం వెస్ట్‌లో యాక్టివ్‌గా ఉంటున్నారు. ఆయనకు గుంటూరు మిర్చి యార్డు ఛైర్మన్ పదవి దక్కినా సరే వెస్ట్‌ని వదల్లేదు.   

మద్దాలి వైసీపీ వైపుకు రావడంతో యేసురత్నంకు కీలక పదవి ఇచ్చారు. అయితే పదవి ఉన్నా సరే, నెక్స్ట్ ఎన్నికల్లో మళ్ళీ వెస్ట్‌లో పోటీ చేయాలని యేసురత్నం చూస్తున్నారు. ఇటు ఎమ్మెల్యేగా ఉన్న మద్దాలి గిరి సైతం తనకే టిక్కెట్ వస్తుందని నమ్మకంతో ఉన్నారు. మరి నెక్స్ట్ ఎన్నికల్లో వీరిలో వెస్ట్ వైసీపీ సీటు ఎవరికి దక్కుతుందా అనేది చూడాలి.