నరసారావుపేట పార్లమెంట్ పరిధిలో పెదకూరపాడు, సత్తెనపల్లి, నరసారావుపేట, వినుకొండ, గురజాల, మాచర్ల, చిలకలూరిపేట నియోజకవర్గాలు ఉన్నాయి. మాచర్ల, నరసారావుపేటలు మినహాయిస్తే మిగిలిన ఐదు నియోజకవర్గాలని కమ్మ నేతలే నడిపిస్తున్నారు. వినుకొండలో జి‌వి ఆంజనేయులు, చిలకలూరిపేటలో ప్రత్తిపాటి పుల్లారావు, పెదకూరపాడులో కొమ్మాలపాటి శ్రీధర్, గురజాలలో యరపతినేని శ్రీనివాసరావు, సత్తెనపల్లిలో కోడెల శివరాంలు సైకిల్‌ని నడిపిస్తున్నారు.

2014 ఎన్నికల్లో ఈ ఐదు నియోజకవర్గాల్లో టీడీపీ గెలిచింది. కానీ 2019 ఎన్నికలోచ్చేసరికి జగన్ గాలిలో ఐదు నియోజకవర్గాల్లో టీడీపీ ఓటమి పాలైంది. అయితే కోడెల శివప్రసాద్ మరణించడంతో సత్తెనపల్లి బాధ్యతలు ఆయన తనయుడు శివరాం చూసుకుంటున్నారు. కాకపోతే కోడెల అంతా ఎఫెక్టివ్‌గా శివరాం పనిచేయడం లేదు. దాని వల్ల సత్తెనపల్లిలో సైకిల్ స్పీడ్ పెరగలేదు. పంచాయితీ, మున్సిపాలిటీ ఎన్నికల్లో టీడీపీకి దారుణమైన ఫలితాలే వచ్చాయి.

అటు చిలకలూరిపేటలో ప్రత్తిపాటి పుల్లారావు, జూనియర్ ఎమ్మెల్యే అయిన విడదల రజిని ముందు తేలిపోతున్నారు. గురజాలలో యరపతినేని శ్రీనివాసరావు దూకుడుగానే ఉంటున్నారు. కానీ టీడీపీ పరిస్తితి మెరుగ్గా కనిపించడం లేదు. అటు వినుకొండలో జి‌వి ఆంజనేయులు, పెదకూరపాడులో శ్రీధర్‌లు బాగానే కష్టపడుతున్నారు.

పార్టీని నిలబెట్టడానికి గట్టి ప్రయత్నాలే చేస్తున్నారు. కాకపోతే జగన్ హవా ఇంకా ఉండటంతో టీడీపీకి పుంజుకునే అవకాశాలు రావడం లేదు. జగన్ హవా వల్లే ఐదు నియోజకవర్గాల్లో టీడీపీ కమ్మ నేతలకు కాస్త ఇబ్బందికర పరిస్థితులు ఉన్నాయి. కానీ ఈ ఐదు నియోజకవర్గాల్లో టీడీపీ కేడర్ బలంగానే ఉంది. కాబట్టి పరిస్థితులు బట్టి సైకిల్ స్పీడ్ పెరిగే అవకాశముంది. చూడాలి మరి నెక్స్ట్ ఎన్నికల్లో ఈ కమ్మ నేతలు సైకిల్‌ని గెలిపిస్తారో లేదో?