ఈ విధంగా కడప జిల్లాలో వైఎస్సార్ ఫ్యామిలీ హవా ఉంటుంది. అయితే ఆ ఫ్యామిలీ హవాలో చాలా నియోజకవర్గాల్లో టీడీపీ గెలిచి ఏళ్ళు గడిచిపోతున్నాయి. అలా టీడీపీ జెండా ఎగిరి ఏళ్ళు గడిచిపోయిన నియోజకవర్గాల్లో మైదుకూరు కూడా ఒకటి. టీడీపీ ఆవిర్భవించాక ఇక్కడ రెండుసార్లు మాత్రమే గెలిచింది. 1985, 1999 ఎన్నికల్లో టీడీపీ తరుపున శెట్టిపల్లి రఘురామిరెడ్డి గెలిచారు. ఈ రెండుసార్లు మాత్రమే టీడీపీ గెలవగా, ఎక్కువసార్లు కాంగ్రెస్ గెలిచింది. గత రెండు ఎన్నికల్లో ఇక్కడ వైసీపీ గెలిచింది.

2014, 2019 ఎన్నికల్లో వైసీపీ జెండా ఎగిరింది. అది కూడా గతంలో టీడీపీలో రెండుసార్లు గెలిచిన శెట్టిపల్లి ఇప్పుడు వైసీపీ తరుపున గెలిచారు. ఇక గత రెండు పర్యాయాల నుంచి ఇక్కడ టీడీపీ తరుపున పుట్టా సుధాకర్ యాదవ్ పోటీ చేసి ఓడిపోతున్నారు. అయితే 2014లో టీడీపీ అధికారంలోకి రావడంతో పుట్టాకు టీటీడీ ఛైర్మన్ పదవి దక్కింది. ఇక అధికారం ఉండటంతో నియోజకవర్గంలో బాగానే అభివృద్ధి కార్యక్రమాలు చేశారు.

కానీ జగన్ వేవ్ ఉండటంతో 2019 ఎన్నికల్లో కూడా ఓడిపోయారు. అయితే నియోజకవర్గంలో పుట్టా బలపడటానికి ప్రయత్నిస్తున్నారు. ఇటీవల జరిగిన మున్సిపాలిటీ ఎన్నికల్లో మైదుకూరులో టీడీపీ సత్తా చాటింది. రాష్ట్ర వ్యాప్తంగా వైసీపీ గెలిచినా, మైదుకూరులో 24 వార్డుల్లో టీడీపీ 12 గెలిచింది. అటు వైసీపీకి 11, జనసేనకు ఒక వార్డు వచ్చింది. వైఎస్సార్‌సీపీకి ఇద్ద‌రు ఎక్స్ అఫిషియో స‌భ్యుల‌తో క‌లుపుకుంటే వైసీపీ బ‌లం 13కి పెరిగడంతో మైదుకూరు మున్సిపాలిటీ చేజారింది. అయితే ఎక్కువ వార్డులు గెలవడం టీడీపీకి కలిసొచ్చే విషయం. ఇదే ఊపు నెక్స్ట్ ఎన్నికల వరకు కొనసాగించి సత్తా చాటాలని పుట్టా చూస్తున్నారు. కానీ జగన్ వేవ్‌లో పుట్టాకు గెలిచే ఛాన్స్ దక్కుతుందా అనేది డౌటే.