టాలీవుడ్ కి సంబంధించిన అద్భుతమైన సినిమాలను భద్రపరచి వాటి పూర్తి సమాచారాన్ని అందుబాటులో ఉంచేలా డిజిటల్ మ్యూజియం ఏర్పాటు చేయబోతున్నారు అని తెలుస్తోంది. దీనికోసం పక్కా ప్లాన్ కూడా సిద్ధం చేస్తున్నానని, ముందుగా తన తండ్రి ఏఎన్ఆర్ నటించిన సినిమాలు సేకరిస్తున్నట్లు ఆయన చెబుతున్నారు. ప్రస్తుతం అందుబాటులో ఉన్న సాంకేతికత ఆధారంగా చేసుకుని ఈ మ్యూజియం ఏర్పాటు చేస్తానంటున్నారు నాగ్. తెలుగు చిత్ర పరిశ్రమ గొప్పతనాన్ని అందరికీ తెలియజేసేలా ఈ మ్యూజియం ఉంటుందని, అది తన డ్రీమ్ ప్రాజెక్ట్ అంటున్నారు ఆయన. 

 ఈ యంగ‌ర్ జన‌రేష‌న్ కి  తెలుగు క్లాసిక్స్ గురించి పెద్ద‌గా తెలీదన్న ఆయన అలాంటి వారికి తెలుగు సినిమా ఎలా ప‌రిణామం చెందిందో సాంకేతిక‌త ద్వారానే తెలియ‌జేయడం సుల‌భమని అన్నారు. ఇప్పుడు దేని గురించి అయినా వివ‌రాలు కావాలంటే ఎవ‌రూ పుస్త‌కాల్లో వెత‌కట్లేదన్న ఆయన ఏ స‌మాచారం కావాల‌న్నా ఆన్‌లైన్‌లో వీడియోలు చూసి తెలుసుకుంటున్నారని అన్నారు. సినిమాల విష‌యంలోనూ అదే ప‌రిస్థితి ఉందని అన్నారు. మా నాన్న సుమారు 300 సినిమాల్లో న‌టించారు. వాట‌న్నింటినీ దాయ‌లేదని టెక్నాల‌జీ సాయంతో వాటిల్లో కొన్ని క్లాసిక్ చిత్రాల్ని సేవ్ చేయ‌గ‌లిగామని అన్నారు. అలా మిగతా అందరి సినిమాలను సేవ్ చేసే పనిలో ఉన్నానని ఆయన చెప్పుకొచ్చారు.