అలాగే వైద్యం తీసుకున్న వారి దగ్గరికి వెళ్లి పరిస్థితి ఎలా ఉందో తెలుసుకున్నారని అంటున్నారు. నివేదిక రెండు మూడు రోజుల్లో వస్తుందని చెబుతున్నారు. ఇక అనంతరం వారు మీడియాతో మాట్లాడుతూ ప్రస్తుతం ఆనందయ్య గారు లేరని ఆయన వచ్చిన తర్వాత మళ్లీ ఒకసారి వచ్చి పరిశీలన చేస్తామని పేర్కొన్నారు. అయితే ఇప్పటివరకు ఒక నెగెటివ్ మార్కు కూడా లేదు... మొత్తం అంత ఫాస్ట్ గానే ఉందని, త్వరగా నివేదిక వచ్చేలా చూస్తామని వారు పేర్కొన్నారు. ఇక అంతకుముందు వైద్యారోగ్య శాఖ ముఖ్య కార్యదర్శి అనిల్ కుమార్ సింఘాల్ మాట్లాడుతూ ఆనందయ్య ఆయుర్వేద చికిత్సపై అధ్యయనం జరుగుతోందని అన్నారు. 

కేంద్ర ఆయుష్ శాఖ ప్రతినిధులతో సంప్రదింపులు జరిపామని పేర్కొన్న ఆయన ఆయుష్ విభాగం అధ్యయనం చేయనుందని, ఏపీ ఆయుష్ కమిషనర్ ఇప్పటికే వెళ్లారని పేర్కొన్నారు. ఇప్పటి వరకు జరిగిన అధ్యయనంలో ఆనందయ్య ఆయుర్వేదం విషయంలో ఎలాంటి ఇబ్బంది లేదనే చెబుతున్నారని హానికారకాలు ఉన్నట్టు తేలలేదని చెప్పుకొచ్చారు. అయితే శాస్త్రీయపరంగా మరింత అధ్యయనం చేయాల్సి ఉందని అన్నారు.