అయితే అమరావతికి మద్ధతుగా ఉన్న టీడీపీపై విశాఖలో వ్యతిరేకిత వస్తుందని అంతా అనుకున్నారు. వైసీపీ సైతం ఆ వ్యతిరేకితని సృష్టించడానికి గట్టిగానే ప్రయత్నించింది. కానీ అది సాధ్యం కాలేదు. ఇటీవల జరిగిన కార్పొరేషన్ ఎన్నికల్లో వైసీపీ క్లీన్‌స్వీప్ చేసిన విషయం తెలిసిందే. అయితే రాష్ట్రంలో మిగతా కార్పొరేషన్లలో టీడీపీ ఘోరంగా ఓడిపోయింది. కానీ విశాఖలో మాత్రం వైసీపీకి టఫ్ ఫైట్ ఇచ్చింది. 98 డివిజన్లలో 30 వరకు గెలిచింది. అలాగే తమ మద్ధతుతో మరో మూడు డివిజన్లలో కమ్యూనిస్టులు, ఇతరులు గెలిచారు. ఇక వైసీపీ 58 గెలుచుకుని కార్పొరేషన్ దక్కించుకుంది.

అమరావతి పక్కనే ఉన్న గుంటూరు, విజయవాడ నగరాల్లో టీడీపీ ఘోరంగా ఓడిపోతే విశాఖలో మాత్రం సత్తా చాటింది. అలా విశాఖలో సత్తా చాటాడానికి కారణాలు లేకపోలేదు. విశాఖ పార్లమెంట్ అధ్యక్షుడు పల్లా శ్రీనివాస్ పార్టీ కోసం గట్టిగానే కష్టపడ్డారు. విశాఖ స్టీల్ ప్లాంట్ ప్రైవేటీకరణకు వ్యతిరేకంగా దీక్ష చేశారు. గంటా శ్రీనివాసరావుతో పాటు మిగతా సీనియర్లు చేతులెత్తేయడంతో పల్లా అన్నీ తానై పార్టీని నడిపించారు. కష్ట సమయంలో తప్పించుకుని తిరుగుతున్న గంటా కంటే బెటర్‌గా పల్లా పార్టీ కోసం పనిచేశారు. ఈ విధంగా చేయడం వల్లే విశాఖలో టీడీపీ నిలబడింది.