కరోనా నుంచి కోలుకున్న పవన్ కళ్యాణ్ ప్రస్తుతం సంపూర్ణ ఆరోగ్యంతో ఉన్నాడని తెలుస్తోంది. అయితే తెలంగాణ ఆంధ్రప్రదేశ్ లో ఉన్న దాదాపు అందరూ రాజకీయ నాయకులు బయటకు వచ్చి కరోనా పేషెంట్స్ కి ధైర్యం చెబుతున్నారు కానీ కరోనా బారిన పడడంతో తీవ్రమైన అనారోగ్యానికి గురయిన పవన్ కళ్యాణ్ బయటకు ఇప్పట్లో రాకూడదని నిర్ణయించుకున్నట్లు తెలుస్తోంది. దీంతో ఆయన మరికొన్నాళ్ళ పాటు వర్క్ ఫ్రం హోం చేస్తూ ఇంటి నుండే ప్రెస్ నోట్ లు రిలీజ్ చేస్తారని అంటున్నారు. 

అయితే పవన్ కళ్యాణ్ అభిమానులు మాత్రం ఒక పక్క సేవా కార్యక్రమాలు చేస్తూ ఎవరికి అవసరం వచ్చినా అండగా నిలుస్తూ వెళుతున్నారు. ఇక సినిమాల విషయానికి వస్తే పవన్ కళ్యాణ్ దాదాపు నాలుగు సినిమాలు ప్రకటించిన సంగతి తెలిసిందే. అందులో క్రిష్ దర్శకత్వంలో తెరకెక్కుతున్న హరిహర వీరమల్లు అలాగే మలయాళ సూపర్ హిట్ సినిమా తెలుగు రీమేక్ షూటింగ్ మధ్యలో ఉన్నాయి. ఇక మరో రెండు సినిమాలు ప్రీ ప్రొడక్షన్ దశలో ఉన్నాయి. ఇక పవన్ కళ్యాణ్ తో తాను చేయబోయే సినిమాకి సంబంధించి బండ్ల గణేష్ కూడా క్లారిటీ ఇచ్చారు. రమేష్ వర్మతో సినిమా ఉంటుందని ప్రచారం జరుగుతూ ఉండగా అది నిజం కాదని పేర్కొన్నారు.