ఆ ఎన్నికల్లో జగన్ వేవ్‌లో వైసీపీ 14 అసెంబ్లీ సీట్లు, ఒక ఎంపీ సీటు గెలుచుకుంది. అటు టీడీపీ రెండు అసెంబ్లీ, ఒక ఎంపీ సీటు మాత్రమే గెలుచుకుంది. అయితే ఇందులో గన్నవరం నుంచి గెలిచిన వల్లభనేని వంశీ వైసీపీ వైపుకు వెళ్ళిపోయారు. దీంతో టీడీపీకి ఒక ఎమ్మెల్యే, ఒక ఎంపీ మాత్రమే మిగిలారు. అటు ఓడిపోయిన నేతలు కూడా పార్టీలో పెద్దగా కనిపించడం లేదు. వైసీపీ ప్రభుత్వం దెబ్బకు పలువురు టీడీపీ నేతలు సైడ్ అయిపోయారు. అసలు పార్టీని బలోపేతం చేసే కార్యక్రమం ఒక్కటీ చేయడం లేదు. దీంతో స్థానిక సంస్థల ఎన్నికల్లో సైతం జిల్లాలో టీడీపీకి ఘోరమైన ఫలితాలు వచ్చాయి.

ముఖ్యంగా నాయకత్వం వీక్‌గా ఉన్న నియోజకవర్గాల్లో టీడీపీ అడ్రెస్ లేకుండా పోయింది. అలా టీడీపీ నాయకత్వం వీక్‌గా ఉన్న నియోజకవర్గాల్లో తిరువూరు ముందు వరుసలో ఉంది. గత ఎన్నికల్లో ఇక్కడ నుంచి ఓడిపోయిన కే‌ఎస్ జవహర్, ప్రస్తుతం కొవ్వూరు రాజకీయాలపై దృష్టి పెట్టారు. ఇక్కడే ఉన్న మాజీ ఎమ్మెల్యే నల్లగట్ల స్వామిదాస్ పార్టీని పెద్దగా పట్టించుకోవడం లేదు. దీంతో స్థానిక సంస్థల ఎన్నికల్లో ఇక్కడ టీడీపీ ఘోరంగా ఓడిపోయింది.

అయితే స్వామిదాస్ 1994, 1999 ఎన్నికల్లో టీడీపీ తరుపున గెలిచారు. ఇక 2004, 2009, 2014 ఎన్నికల్లో వరుసగా ఓడిపోయారు. దీంతో 2019లో మాజీ మంత్రి జవహర్‌ని తిరువూరులో నిలబెట్టారు. ఆయన కూడా జగన్ వేవ్‌లో ఓటమి పాలయ్యారు. ఓడిపోయాక జవహర్ మళ్ళీ తన పాత నియోజకవర్గం కొవ్వూరుపై దృష్టిపెట్టారు. దీంతో తిరువూరులో సైకిల్‌ని నడిపించే నాథుడు లేకుండా పోయాడు. స్వామిదాస్ సైతం సైలెంట్‌గానే ఉంటున్నారు. ఇలా నాయకులు సరిగ్గా లేకపోవడం వల్ల తిరువూరులో టీడీపీ బాగా వీక్ అయిపోయింది.