అయితే టీడీపీలోని కమ్మ నాయకులకు చెక్ పెట్టాలంటే అదే సామాజికవర్గానికి చెందిన నేతలే ఉండాలి. అందుకే 2019 ఎన్నికల్లో మైలవరంలో దేవినేని ఉమా మీద వైసీపీ నుంచి వసంత కృష్ణప్రసాద్‌ని నిలబెట్టారు. ఆ ఎన్నికల్లో వసంత విజయం సాధించారు. అటు పెనమలూరులో బోడే ప్రసాద్‌పై యాదవ సామాజికవర్గానికి చెందిన పార్థసారథి విజయం సాధించారు.

ఇక తూర్పు నుంచి గెలిచిన టీడీపీ ఎమ్మెల్యే గద్దె రామ్మోహన్‌కు చెక్ పెట్టడానికి దేవినేని అవినాష్‌ని పార్టీలోకి తీసుకున్నారు. అయితే అవినాష్ వచ్చాక తూర్పులో పరిస్తితి చాలా మారింది. అవినాష్ ఇక్కడ వైసీపీని బలోపేతం చేస్తున్నారు. గద్దెకు ధీటుగా పనిచేస్తున్నారు. అధికారంలో ఉండటంతో ఎమ్మెల్యే కంటే ఎక్కువే పనులు చేస్తున్నారు. దీని వల్ల తూర్పులో వైసీపీకి బాగా బలం పెరిగింది. అలా బలం పెరగడం వల్లే మొన్న జరిగిన కార్పొరేషన్ ఎన్నికల్లో విజయవాడలో వైసీపీ జెండా ఎగిరింది.

ఇటు గన్నవరంలో వల్లభనేని వంశీ టీడీపీని వీడి వైసీపీలోకి వచ్చిన విషయం తెలిసిందే. ఎప్పుడైతే వంశీ వైసీపీలోకి వచ్చారో అప్పటినుంచి గన్నవరంలో టీడీపీ అడ్రెస్ లేకుండా పోయింది. అసలు ఇక్కడ టీడీపీ జెండా కనిపించడం లేదు. ప్రస్తుతానికి ఇక్కడ టీడీపీ తరుపున బచ్చుల అర్జునుడు పనిచేస్తున్నారు. అయినా సరే టీడీపీని బలోపేతం చేయలేకపోతున్నారు. మొత్తానికైతే విజయవాడ రాజకీయాల్లో వైసీపీ హవా బాగా పెరిగింది.