ఎక్కువ మంది ఆక్సిజన్ అందకే చనిపోతున్నారు. అయితే ప్రభుత్వ పరంగా ఎంత చేయాలో అంత చేస్తుంది. కానీ తమని గెలిపించిన ప్రజల కోసం నాయకులు మాత్రం ముందుకు వస్తున్నట్లు కనిపించడం లేదు. మొదటి వేవ్ ఉన్న సమయంలో లాక్‌డౌన్ పెట్టినప్పుడు నాయకులంతా రోడ్ల పైకి వచ్చారు. ప్రజలకు ఉచితంగా మాస్కూలు, శానిటైజర్లు, కూరగాయలు, నిత్యవసరాలు అందించారు.

కానీ ఈ రెండో వేవ్‌లో నాయకులు పెద్దగా కనిపించడం లేదు. అధికార పక్షం కావొచ్చు, ప్రతిపక్షం కావొచ్చు ఏ నాయకుడు కూడా ప్రజలని పట్టించుకున్నట్లు కనిపించడం లేదు. ముఖ్యంగా అధికార పార్టీ ఎమ్మెల్యేలకు ఎక్కువ బాధ్యత ఉంటుంది. అందులోనూ వైసీపీ ఎమ్మెల్యేలు పెద్ద సంఖ్యలో ఉన్నారు. కానీ అంతే పెద్దగా ప్రజలకు అండగా ఉంటున్నట్లు లేరు. ఎన్నికల సమయంలో పెద్ద ఎత్తున ఓట్ల కోసం ప్రజల దగ్గరకొచ్చిన ఎమ్మెల్యేలు, ఎంపీలు ఇప్పుడు ప్రజలు కష్టాల్లో ఉంటే ఆదుకునే పరిస్తితి లేదు.

పోనీ కరోనా తీవ్రంగా ఉంది కాబట్టి బయటకు రావడం లేదు అనుకోవచ్చు. బయటకు రాకపోయినా ప్రజలకు ఏదొక రూపంలో సాయం చేస్తే బెటర్‌గా ఉంటుంది. అయితే కొంతమంది ఎమ్మెల్యేలు మాత్రం ఏదొక విధంగా ప్రజలకు సాయం చేస్తున్నారు. కానీ ప్రజాప్రతినిధులంతా రంగంలోకి దిగి ప్రజలకు అండగా ఉంటే పరిస్తితి వేరుగా ఉంటుంది. మరి చూడాలి ఏ నాయకుడు ప్రజల కోసం నిలబడతారో.