చంద్రబాబు జీవితంలో ఆయన తల్లి పోషించిన పాత్ర గురించి ఎంత చెప్పినా తక్కువే. నిజానికి ఒక రకంగా చంద్రబాబు రాజకీయాల్లోకి ప్రవేశించాలి అని భావించినప్పుడు అందరికంటే ఆయనను ఎక్కువగా ప్రోత్సహించింది తల్లి అమ్మణమ్మ అని చెబుతూ ఉంటారు. ఆర్థికంగా పెద్దగా స్థితిమంతులము కాదు కదా మనకి ఎందుకు ఈ రాజకీయాలు అని చంద్రబాబు  తండ్రి ఖర్జూర నాయుడు వారించినా సరే ఆయనను ఒప్పించి ఆర్థిక సహాయం చేయించిందట అమ్మణమ్మ. అలానే మొట్టమొదటిసారి ఎమ్మెల్యేగా పోటీ చేసిన సందర్భంలో కూడా ఆమె చాలా విధాలుగా సహాయం చేసి చంద్రబాబు నాయుడు నేడు ఈ స్థాయికి రావడానికి కారణం అయ్యారని చెబుతుంటారు. 

చంద్రబాబు వెంట ఉన్న స్నేహితులకు ఎప్పటికప్పుడు ఆమె ఏ లోటు రాకుండా చూసుకునే వారని చెబుతూ ఉంటారు.. ఇక ముందు కాంగ్రెస్ నుంచి తన రాజకీయ జీవితం మొదలు పెట్టిన చంద్రబాబు పెళ్లి విషయంలో కూడా నిర్ణయం తీసుకోవడానికి తల్లి అమ్మణమ్మ ప్రోత్సాహమే ఉందని చెబుతూ ఉంటారు. ఆ వివాహం తోనే చంద్రబాబు జీవితం ఒక మలుపు తిరిగింది. ఆ అనంతరం వచ్చిన ఎన్నికల్లో ఆయన ఓడిపోవడం, తెలుగుదేశంలో చేరడం అనంతర కాలంలో తెలుగుదేశం పార్టీని నాయకత్వం వహించే స్థాయికి ఎదగడం వంటి అంశాలు అందరికీ తెలిసిందే. అలా అన్ని విషయాల్లో అండగా ఉంటూ ఆమె చంద్రబాబు ఈ స్థాయికి రావడానికి కారణం అయ్యారు.