1991 మే 9న గ్యాంగ్ లీడర్ సినిమా రిలీజ్ అయింది.. మెగాస్టార్ చిరంజీవి హీరోగా విజయశాంతి హీరోయిన్ గా నటించిన ఈ సినిమాను విజయబాపినీడు తెరకెక్కించారు. మాగంటి రవీంద్రనాథ్ చౌదరి నిర్మాణంలో తెరకెక్కిన ఈ సినిమాకు బప్పీలహరి సంగీతం అందించారు.. అయితే ఈ సినిమా తెరకెక్కడం వెనుక చాలా ఆసక్తికర విషయాలు ఉన్నాయి. చిరంజీవి కెరీర్ లోనే భారీ బ్లాక్ బస్టర్ గా నిలిచిన ఈ సినిమాకు అసలు ముందు అనుకున్న హీరో చిరంజీవి కాదట.. మరో హీరోని దృష్టిలో పెట్టుకుని కథ సిద్ధం చేశామని ఆ మధ్య పరుచూరి బ్రదర్స్ వెల్లడించారు.

అప్పటి వరకు సినిమాల్లో రాణించలేక ఇబ్బందులు పడుతున్న తన తమ్ముడు నాగబాబుని హీరోగా నిలబెట్టాలి అనే ప్రయత్నంతో చిరంజీవి పరుచూరి బ్రదర్స్ ను తమ్ముడి కోసం ఒక మంచి కథ సిద్ధం చేయమని కోరారట. ఈ కధ సిద్ధం చేసిన పరుచూరి బ్రదర్స్ షోలే సినిమాలో బాగా ఫేమస్ అయిన అరె ఓ సాంబ అనే టైటిల్ పెట్టి విజయబాపినీడు వద్దకు తీసుకు వెళ్లారట. అలా ఈ కథ నాగబాబు వరకు వెళ్లగా కథ మొత్తం విన్న తర్వాత ఈ సినిమా తనకు అస్సలు సూట్ కాదని మాస్ ఇమేజ్ ఉన్న అన్నయ్యకు మాత్రమే సరిపోతుంది అని స్వయంగా నాగబాబు సూచించడంతో నిజమే నని భావించి పరుచూరి బ్రదర్స్ అదే కధకి కొన్ని చిన్న మార్పులు చేర్పులు చేసి గ్యాంగ్ లీడర్ ను సిద్ధం చేశారు.  అలా తమ్ముడి కోసం సిద్ధం చేసిన కథతో అన్నయ్యతో సినిమా తీసి అనేక రికార్డులు సృష్టించారు.