దాసరి సినిమాల ద్వారా ఎంతో మంది సినిమా ఇండస్ట్రీలో సెటిల్ అయ్యారు. అవకాశాలు దక్కిన వాళ్లు స్టార్స్ గా ఎదిగారు అవకాశాలు అంతగా దక్కని వారు ఇండస్ట్రీలో ఏదో ఒక రూపంలో తమ సత్తా చాటుతున్నారు. నిజానికి తెలుగు ఇండస్ట్రీకి పెద్దగా వ్యవహరించిన దాసరి ఇంటి తలుపులు ఎప్పుడూ తెరిచే ఉంచేవారు.. అర్ధరాత్రి సమయంలో ఇబ్బంది కలిగిందని ఆయన ఇంటికి వెళ్ళినా తగిన న్యాయం చేస్తారని సినీ జనాలు భావించేవారు. అందుకే ఇప్పటికీ అసలుసిసలైన అందరివాడు అంటే దాసరి అని మాత్రమే సినీ జనం భావిస్తూ ఉంటారు. 

తెలుగులో ఎన్నో సినిమాలు చేసిన దాసరి నారాయణ రావు తమిళ, కన్నడ, హిందీ భాషల్లో సైతం కొన్ని సినిమాలు చేశారు. ఆ తర్వాత రాజకీయ ఆరంగ్రేటం చేసినా సినిమాను వదలలేదు. తన తొలి సినిమా తాతా-మనవడు మొదలు దాదాపు ఆయన తెరకెక్కించిన అన్ని సినిమాల్లోనూ సామాజికంగా అందరూ ఎదుర్కొంటున్న సమస్యలను ప్రస్తావించేవారు. ఆ సమస్యలను ఎదుర్కొనేందుకు సైతం తగిన మార్గాలు చూపించేవారు. దాసరి భౌతికంగా దూరమై ఏళ్లు గడుస్తున్నా ఆయన ఇంకా తమ మధ్య ఉన్నారని సినీ జనం భావిస్తూ ఉండడం ఆయనకు దక్కిన నిజమైన నివాళిగా చెప్పచ్చు.