అయితే స్థానిక సంస్థల ఎన్నికల్లో తిరుగులేని విజయాలు సాధించిన వైసీపీ, తిరుపతిలో కూడా భారీ మెజారిటీతో గెలుస్తుందని ముందు నుంచే చర్చ జరుగుతుంది. కానీ వైసీపీకి ధీటుగా టీడీపీ ప్రచారం చేయడంతో రిజల్ట్‌లో ఏదైనా ట్విస్ట్ ఉంటుందా అని అంతా ఎదురుచూస్తున్నారు. ఇక తాజాగా వెలువడిన ఎగ్జిట్ పోల్స్‌లో వైసీపీకి భారీ మెజారిటీ రావడం ఖాయమని అర్ధమవుతుంది. ఇక ఎగ్జిట్‌పోల్స్‌లో వచ్చింది నిజమో కాదో తెలియాలంటే మే 2 వరకు వెయిట్ చేయాల్సిందే.

కాకపోతే ఎగ్జిట్‌పోల్స్‌పై తెలుగు తమ్ముళ్ళు తీవ్ర అసంతృప్తితో ఉన్నారు. అసలు టీడీపీ ప్రచారానికి పెద్ద ఎత్తున ప్రజలు వచ్చారని, దాని బట్టి చూసుకుంటే టీడీపీకి కూడా మంచిగానే ఓట్లు పడే అవకాశముందని అంటున్నారు. ఒకవేళ ఓడిపోయినా అది తక్కువ మెజారిటీతోనే జరుగుతుందని మాట్లాడుతున్నారు. అలా కాకుండా వైసీపీ భారీ మెజారిటీతో గెలిస్తే, అది మంత్రి పెద్దిరెడ్డి మ్యాజిక్ అని తమ్ముళ్ళు చెబుతున్నారు.

పోలింగ్ రోజు వైసీపీ వాళ్ళు పెద్ద ఎత్తున దొంగ ఓట్లు వేయించారని, ఆ విషయం మీడియాలో వచ్చిందని, వైసీపీ అనుకూల మీడియాలో ఈ విషయం హైలైట్ కాకపోయినా, సోషల్ మీడియాలో మాత్రం బాగా హైలైట్ అయిందని అంటున్నారు. కాబట్టి వైసీపీకి భారీ మెజారిటీ వస్తే అది దొంగ ఓట్ల ఎఫెక్ట్ అని తమ్ముళ్ళు గట్టిగా చెబుతున్నారు. మరి చూడాలి అసలు ఫలితం ఎలా ఉండబోతుందో?