కరోనా మృతుల సంఖ్య దాచి పెట్టాల్సిన అవసరం లేదంటూ ఏపీ వైద్య ఆరోగ్య శాఖ ముఖ్య కార్యదర్శి ఒక ప్రకటన కూడా విడుదల చేశారు. మరి ప్రభుత్వం చెబుతున్న లెక్కలకు, శ్మశానాల్లో కనిపిస్తున్న వాస్తవాలకు పొంతన ఎందుకు కుదరడం లేదని చాలామంది ఆందోళన వ్యక్తం చేస్తున్నారు. కారణాలు ఏమిటో తెలియదు కానీ ఈ నెల 20 తర్వాత శ్మశానాలకు వస్తున్న మృతదేహాల సంఖ్య పెరుగుతోంది. 

గుంటూరు, విజయవాడ, విశాఖ, రాజమహేంద్రవరం నగరాల్లో శవాల సంఖ్య దాదాపు రెట్టింపయినట్లు చెబుతున్నారు. దీనిపై ప్రజల్లో పలు సందేహాలు వ్యక్తమవుతున్నాయి. వాస్తవాలకు పొంతన ఉండడం లేదనే అనుమానాలున్నాయి. కానీ ప్రభుత్వం మాత్రం వాటిని సరి కాదని అంటోంది. ''కరోనా పాజిటివ్‌ కేసులు గానీ, మృతులను కానీ దాచి పెట్టాల్సిన అవసరం ప్రభుత్వానికి లేదని ప్రభుత్వం చెబుతోంది. అయితే ఇప్పుడు సాధారణ మరణాలను కూడా కోవిడ్ ఖాతాల్లో వేసేస్తున్నారు కొంతమంది. మామూలుగా చనిపోయినా కరోనా అనే ప్రచారం చేయడంతో ఈ పరిస్థితి నెలకొందని అంటున్నారు. ఇక ప్రభుత్వం ఎంతయినా ఈ అంశం మీద ద్రుష్టి పెట్టాల్సిన అవసరం ఉంది.