తాజాగా ఇలాంటి కేటగిరికి చెందిన ఓ సంఘటన గుజరాత్ రాష్ట్రంలో చోటు చేసుకుంది. గర్భిణీగా ఉన్న ఓ నర్సు కోవిడ్ అత్యవసర పరిస్థితుల్లో కూడా సేవలు చేస్తూ అందరి దగ్గర ప్రశంసలు పొందుతోంది. ముస్లిం అయిన ఆమె రంజాన్ మాసంలో ఉపవాస దీక్షలు చేస్తూనే కరోనా బాధితులకు సేవలు చేయడంతో ప్రజలందరూ ఫిదా అవుతున్నారు. నిండు గర్భిణీగా ఉన్న ఆమెను కరోనా వైరస్ నుంచి దేవుడు కాపాడాలని, పండంటి బిడ్డను జన్మనివ్వాలని ఆశీర్వదిస్తున్నారు.

ఆమె పేరు నాన్సీ అయేజా మిస్త్రీ. గుజరాత్‌లోని సూరత్‌లో నర్సుగా ఉద్యోగం చేస్తున్నారు. కరోనా కేసులు పెరుగుతున్న నేపథ్యంలో ప్రస్తుతం ఆమె సురత్‌లోని అల్థాన్‌ కమ్యూనిటీ హాల్‌లో కోవిడ్‌ రోగులకు సేవలు అందిస్తోంది. ప్రస్తుతం ఆమెకు నెలుగో నెల. అయినా ఆమె ఏ మాత్రం భయపడకుండా రోగులకు చికిత్స అందిస్తోంది. ఇంకా ప్రత్యేకత ఏంటంటే.. రంజాన్ మాసంలో చేపట్టే ఉపవాసదీక్ష నియమాలు పాటిస్తూ.. ఎప్పుడు అలసి పోకుండా వైద్యం చేయడం. రోజూకీ 8 నుంచి 10 గంటల పాటు ఎంతో చురుగ్గా పాల్గొని వైద్యం చేస్తుంటారు. ఇంత రిస్క్ తీసుకుని కడుపులో బిడ్డను మోస్తూ విధులు నిర్వహించడం అవసరమా అని ఆమెను ఎవరైనా ప్రశ్నిస్తే.. ఆమె నవ్వుతూ.. నా కడుపులో బిడ్డ పెరుగుతున్న విషయం వాస్తవమే.. కానీ, ప్రస్తుతం పరిస్థితి వల్ల ప్రజలందరూ ఆందోళన చెందుతున్నారు. ఇలాంటి సమయంలో వారందరికీ నా అవసరం కొంతైనా ఉంటుంది. ఇంట్లో కూర్చోవడం కన్నా.. సేవ చేయడం వల్ల కొంత వరకు పుణ్యం దొరుకుతుందని ఆమె చెప్పుకొచ్చారు.