హెరాల్డ్ ఎడిటోరియల్ : రాష్ట్రం పరువు తీసేసిన చంద్రన్న

చంద్రబాబు చెప్పినదేమంటే సెకెండ్ వేవ్ ను నియంత్రించటంలో జగన్ విఫలమయ్యారట. అత్యధిక కరోనా వైరస్ కేసులు నముదవుతున్న రాష్ట్రాల్లో ఏపి 5వ స్ధానంలో ఉందన్నారు. రాష్ట్రంలో పరిస్దితులు చాలా దయనీయంగా ఉన్నాయని ఆందోళన వ్యక్తంచేశారు. ఇప్పటివరకు 9.5 లక్షలమంది వైరస్ బారినపడితే 7.5 వేల మంది  చనిపోయారట. కరోనా నిబంధనల అమలులో రాష్ట్రం విఫలమైందన్నారు. టెస్టింగ్, ట్రేసింగ్, ట్రాకింగ్ విషయంలో కేంద్రమార్గదర్శకాలను రాష్ట్రం పట్టించుకోకపోవటం వల్లే రాష్ట్ర పరిస్దితి ఇంత ఘోరంగా తయారైందన్నారు. ఇక్కడ గమనించాల్సిన విషయం ఏమిటంటే ఓం బిర్లా ముందు రాష్ట్రాన్ని కించపరిచి, అవమానించటం ద్వారా ప్రధానమంత్రి నరేంద్రమోడికి దగ్గరవుదామన్న ఆలోచనే కనబడుతోంది. ఇంత మాట్లాడిన చంద్రబాబు కరోనా నియంత్రణకు చేసిన సూచనలేదు, సలహాలేదు.

కేంద్రమార్గదర్శకాలను ఏపి పట్టించుకోకపోవటం వల్లే కేసులు పెరిగిపోవటమే నిజమని అనుకుందాం. మరి ఏపికన్నా కేసులు చాలా ఎక్కువగా నమోదవుతున్న మహారాష్ట్ర, ఢిల్లీ, గుజరాత్, మధ్యప్రదేశ్, ఉత్తరప్రదేశ్ మాటేమిటి ? కేసులు ఎక్కువగా నమోదవుతున్న రాష్ట్రాల్లో మూడు రాష్ట్రాలు బీజేపీ పాలిత రాష్ట్రాలే కదా . చంద్రబాబు లెక్క ప్రకారం అవికూడా కేంద్ర మార్గదర్శకాలను పాటించనట్లే కదా. ఆ రాష్ట్రాల్లో కేసులు పెరగటానికి కూడా జగనే కారణమా ? దేశవ్యాప్తంగా కరోనా వైరస్ సెకెండ్ వేవ్ ఉధృతి చాలా స్పీడుగా ఉంది. మరి దీని నియంత్రణలో నరేంద్రమోడి కూడా ఫెయిల్ అయినట్లే కదా. చంద్రబాబు మరచిపోయిన విషయం ఏమిటంటే కరోనా నియంత్రణలో ప్రభుత్వంతో పాటు జనాలకు కూడా బాధ్యతుంది. ప్రభుత్వం ఎన్నిచర్యలు తీసుకున్నా జనాలు లెక్కచేయకపోతే ఎవరు చేసేదేమీలేదు. వర్చువల్ మీటింగ్ లో పాల్గొనే అవకాశం దొరికింది కదాని జగన్ పరువు తీసేద్దామనే తొందరలో చంద్రబాబు రాష్ట్రపరువే తీసేశారు.