టీడీపీ గెలుస్తుందన్న భయంతోనే వైసీపీ రిగ్గింగ్‌కు పాల్పడుతోందని ఆరోపించారు. మంత్రి పెద్దిరెడ్డి జిల్లా నలువైపుల నుంచి దొంగ ఓట్లు వేయడానికి తీసుకొచ్చారని, నకిలీ ఓటరు కార్డులు ముద్రిస్తుంటే పోలీసులు ఏం చేస్తున్నారని ఆమె ప్రశ్నించారు. ఎస్పీకి ఫోన్ చేసినా స్పందించడం లేదని, ఈసీకి ఫిర్యాదు చేసినా ఉపయోగం లేకుండా పోయిందని పనబాక లక్ష్మి చెప్పారు. ఇక ఈ అంశం మీడియాలో, సోషల్ మీడియాలో చర్చనీయాంశంగా మారడంతో, వైసీపీ రాష్ట్ర ప్రధాన కార్యదర్శి సజ్జల రామకృష్ణ రెడ్డి ప్రెస్ మీట్ ఏర్పాటు చేశారు. మేము అధికారంలోకి వచ్చిన తర్వాత జరుగుతున్న మొదటి ఉప ఎన్నిక, ఎటువంటి ప్రలోభాలు లేకుండా ఓటర్లు స్వేచ్ఛగా ముందుకు వచ్చి ఓట్లు వేసే వాతావరణం ఉందని అన్నారు. గతంతో పోల్చితే ఇంత ప్రశాంతంగా ఎప్పుడూ  పోలింగ్ జరుగలేదన్న ఆయన తిరుపతిలో చంద్రబాబు తన విశ్వరూపం ప్రదర్శిస్తున్నారని అన్నారు.

 చంద్రబాబు కుట్ర పూరితంగా ఆలోచించటానికి అలవాటు పడ్డాడని, దొంగ ఓట్లు వేసేటట్లు అయితే మిగిలిన నియోజకవర్గాల్లో ఎందుకు వేయరు? అని ప్రశ్నించారు. చంద్రబాబు తిరుపతినే ఎందుకు టార్గెట్ చేసుకున్నారు? తిరుపతికి రోజూ లక్ష మంది వరకు భక్తులు, పర్యాటకులు వస్తుంటారు, అర్బన్ ప్రాంతంలో బస్సులు పెట్టి ఎవరైనా ఓటర్లు కాని వాళ్ళను తరలించగలుగుతారా? అని ఆయన ప్రశ్నించారు. ఎన్నికలు కేంద్ర ఎన్నికల సంఘం నేతృత్వంలో జరుగుతున్నాయన్న ఆయన కేంద్ర బలగాలు, పర్యవేక్షకులు, వెబ్ కామ్ మానిటరింగ్ జరుగుతున్న సమయంలో ఎవరైనా దొంగ ఓట్లు వేసే అవకాశం ఉంటుందా? అని ప్రశ్నించారు. హేయమైన, దుర్మార్గమైన చర్యలకు చంద్రబాబు పాల్పడుతున్నారని విమర్శించారు.