ఇక అసలు విషయానికి వస్తే తిరుపతి ప్రాంతంలో ఎండలు మండిపోతున్నాయి. దానికితోడు కరోనా వైరస్ సెకెండ్ వేవ్ జనాలను భయపట్టేస్తోంది. కాబట్టి భారీ పోలింగ్ సాధ్యమేనా ? మొన్నటి ఎన్నికల్లో 80 శాతం పోలింగ్ జరిగింది. పార్లమెంటు పరిధిలోని 16.09 లక్షల ఓట్లలో పోలైంది 12.87 లక్షలు. ఇందులో వైసీపీకి 7.22 లక్షల ఓట్లు వస్తే టీడీపీకి వచ్చిన ఓట్లు 4.94 లక్షలు. మిగిలిన పార్టీలు+నోటాకు వచ్చిన ఓట్లు సుమారు లక్ష. ఇపుడు విషయానికి వస్తే రేపటి ఎన్నికల్లో వైసీపీకి రికార్డు మెజారిటి దక్కాలంటే ఓటింగ్ సుమారు 15 లక్షలు జరగాలి. అంటే పోయిన ఎన్నికల్లో పోలైన ఓట్లకన్నా అదనంగా 2 లక్షల ఓట్లు పోలవ్వాలి. ఎన్ని ఓట్లు పోలవుతాయనే విషయం ఎవరి చేతిలోను ఉండదు. కాకపోతే భారీ పోలింగ్ కు అన్నీ పార్టీలు ఈసారి ప్రయత్నించే అవకాశాలున్నాయి.

నిజానికి వైసీపీ ప్రతిపక్షంలో ఉన్నపుడే 2.28 లక్షల ఓట్ల మెజారిటి వచ్చింది. అధికారంలోకి వచ్చిన తర్వాత గడచిన రెండేళ్ళుగా సంక్షేమపథకాలు అమలవుతున్నాయి. తాను అమలు చేస్తున్న సంక్షేమపథకాలే తన పార్టీకి అఖండమెజారిటిని సాధించిపెడతాయన్నది జగన్ ఆలోచన. ఇందులో కొంత వాస్తవం కూడా ఉండచ్చు. పంచాయితి ఎన్నికల్లో గెలిచిన మద్దతుదారులు, మున్సిపల్ ఎన్నికల్లో పార్టీకి అనుకూలంగా వచ్చిన ఫలితాలను బట్టి జగన్ పెట్టిన టార్గెట్ రీచ్ అవ్వటం కష్టం కాదనే అనిపిస్తోంది. ఇదే సమయంలో మొన్నటి ఎన్నికల్లో టీడీపీకి వచ్చిన 4.94 లక్షల ఓట్లలో సగం తగ్గిపోయి తగ్గిన ఓట్లు వైసీపీకి పడితే గురుమూర్తికి భారీ మెజారిటి ఖాయమన్నట్లే. తిరుపతి అసెంబ్లీ ఒక్కటే వెనకబడింది. ఇక్కడ కూడా భారీ మెజారిటి సాధించగలిగితే దేశమంతా తిరుపతి వైపు చూడటం ఖాయమే.