హిట్ పడితే తమ ఖాతాలో వేసుకునే హీరోలు ఫ్లాప్ వస్తే మాత్రం ఆ డైరెక్టర్ తో మరి మూవీస్ చేయరు. ఇక హీరోయిన్ల విషయంలో ఇదే నీతిని అనుసరిస్తారు అని ప్రచారంలో ఉంది. ఒక సినిమా హిట్ కావాలంటే అందరి కృషి ఉంటుంది. కానీ స్టార్ హీరోలు మాత్రం తమ తప్పును అంత తేలికగా ఒప్పుకోరు అన్న టాక్ కూడా ఉంది.

కొంతమంది హీరోలు ఈ బాధ అంతా ఎందుకు అని వరసపెట్టి హిట్లు ఇస్తున్న డైరెక్టర్ల వెంట పడుతున్నారుట. వారితోనే సినిమాలు చేస్తున్నారుట. వారికే పిలిచి మరీ ఆఫర్లు ఇస్తున్నారుట. దీంతో అంతకు ముందు అదే హీరోకు హిట్లు ఇస్తున్నా కూడా ఒక్క ఫ్లాప్ ఇస్తే చాలు ఎవరూ పట్టించుకోని స్థితిలోకి ఎంతటి స్టార్ డైరెక్టర్ అయినా చేరుకోవాల్సిందే అంటున్నారు.

ఇక స్టార్ హీరోల సినిమాలు అంటే కత్తి మీద సాము, పులి మీద స్వారీ అని కూడా చెబుతున్నారు. వారి సినిమాలో డైరెక్టర్ కి ఎంత ఫ్రీడం ఉంటుంది అన్నది కూడా ఎవరూ చెప్పలేరు. అనేక రకాలుగా సలహా సూచనలు బెటర్ మెంట్ అన్న దానితో ఇస్తూ పోతూంటారు. చివరికి ఆ డైరెక్టర్ అనుకున్న సబ్జెక్ట్ ఒకటి తెర మీద కనిపించేది వేరొకటిగా మారిన సందర్భాలు కూడా చాలా ఉన్నాయని అంటున్నారు. ఏది ఏమైనా చివరికి సినిమా హిట్ ఐతే ఆ డైరెక్టర్ బతికి బట్టకట్టినట్లే అంటున్నారు. సినిమా పోయిందా ఇక తరువాత సినిమా అన్నదే ఉండదు. దీంతో చాలా మంది ఒకపుడు స్టార్ డైరెక్టర్లుగా ఉండి ఇపుడు చాన్సుల కోసం హీరోలను ఆశ్రయిస్తున్నారు అంటున్నారు. కానీ సక్సెస్ మీదనే మోజుతో హీరోలు మాత్రం వారిని పక్కన పెడుతున్నారుట.