అయితే ఇక్కడ చెప్పుకోవాల్సిన విషయం ఏంటంటే రాష్ట్రం మొత్తం 60 శాతం వరకు పోలింగ్ నమోదైతే, జిల్లాల వారీగా అత్యధికంగా పశ్చిమ గోదావరిలో 68 శాతంపైనే ఓటింగ్ పడింది. అంటే ఇక్కడ జనం ఈ స్థాయిలో ఓట్లు వేయడానికి కారణాలు ఉన్నాయని తెలుస్తోంది. మామూలుగా రాష్ట్రం మొత్తం వైసీపీ ఆధిపత్యం నడుస్తున్న విషయం తెలిసిందే. ఆ పార్టీకే జనం మద్ధతు ఎక్కువగా ఉంది. ఇక ఆ తర్వాత టీడీపీకి జనం సపోర్ట్ ఉంది. కానీ జనసేన కొన్ని జిల్లాల్లోనే ప్రభావం చూపుతుంది. అందులో ముఖ్యంగా పశ్చిమ గోదావరి జిల్లాలో జనసేన బలంగానే ఉంది.

టీడీపీ ఎన్నికలని బహిష్కరించడంతో ఇక్కడ వైసీపీకి పోటీగా జనసేన వచ్చింది. అందుకు తగ్గట్టుగానే జనసేన మద్ధతుదారులు పెద్ద ఎత్తున ఓట్లు వేసినట్లు తెలుస్తోంది. అలాగే టీడీపీకి సపోర్ట్ చేసేవారు కూడా చాలాచోట్ల జనసేనకు ఓట్లు వేసినట్లు తెలుస్తోంది. అందుకే పశ్చిమ గోదావరి జిల్లాలో అత్యధికంగా పోలింగ్ నమోదైంది. మొత్తానికి ఈ జిల్లాలో వైసీపీ-జనసేనల మధ్య పోటీ జరిగిందని చెప్పొచ్చు. అలాగే కొన్నిచోట్ల వైసీపీకి ధీటుగా జనసేన ఓట్లు తెచ్చుకుంటుందనే విశ్లేషణలు వస్తున్నాయి. చూడాలి మరి పశ్చిమ గోదావరిలో ఫలితాలు ఎవరికి అనుకూలంగా ఉంటాయో.