కానీ తర్వాత వచ్చిన ఎన్‌డి‌ఏ ప్రభుత్వం హోదా విషయంలో చేతులెత్తేసింది. ఆ ఎన్‌డి‌ఏలో భాగస్వామిగా ఉన్న టీడీపీ సైతం ఈ విషయాన్ని పెద్దగా పట్టించుకోలేదు. అయితే మధ్యలో ఏ రాష్ట్రానికి హోదా ఇవ్వట్లేదని, కానీ ప్రత్యేక ప్యాకేజ్ ఇచ్చి ఆదుకుంటామని ఎన్‌డి‌ఏ ప్రభుత్వం హామీ ఇచ్చింది. ఇక దీనికి చంద్రబాబు కూడా ఒకే చెప్పేశారు. హోదా కంటే ప్యాకేజ్ ద్వారా ఎక్కువ న్యాయం జరుగుతుందని బీజేపీతో పాటు, టీడీపీ నేతలు గట్టిగానే చెబుతూ వచ్చారు.

అయితే జగన్ నేతృత్వంలోని వైసీపీ మాత్రం హోదా కావాల్సిందే అని పోరాటాలు చేస్తూనే వచ్చింది. అలాగే తమ ఎంపీల చేత రాజీనామా కూడా చేయించారు. ఇంకా తనకు 25కి 25 ఎంపీలు ఇస్తే కేంద్రం మెడలు వంచి, హోదా సాధిస్తామని జగన్ చెప్పారు. అయితే 2019 ఎన్నికల్లో ఏపీ ప్రజలు జగన్‌ని భారీ మెజారిటీతో గెలిపించారు. అలాగే 22 ఎంపీలు కూడా ఇచ్చారు. ఇదే సమయంలో కేంద్రంలో మోదీ నేతృత్వంలోని బీజేపీ ప్రభుత్వం భారీ మెజారిటీతో అధికారంలోకి వచ్చింది. దీంతో కేంద్రాన్ని ప్లీజ్ ప్లీజ్ హోదా ఇవ్వండి అని అడగటం తప్పా, ఏం చేయలేమని జగన్ తేల్చి చెప్పేశారు.

ఇక అక్కడ నుంచి హోదా విషయం మరుగున పడిపోయింది. అయితే ఇప్పుడు తిరుపతి పార్లమెంట్ స్థానానికి ఉపఎన్నిక జరగనున్న నేపథ్యంలో హోదా అంశం తెరపైకి వచ్చింది. వైసీపీకి ఉన్న 22 మంది ఎంపీలు కేంద్రంలో పోరాటం చేయలేకపోతున్నారని, కానీ టీడీపీకి ఉన్న ముగ్గురు ఎంపీలు గట్టిగానే పోరాటం చేస్తున్నారని, కాబట్టి ఇలా పోరాటం చేయాలంటే తిరుపతిలో టీడీపీని గెలిపించాలని ఆ పార్టీ నేతలు ప్రచారం చేస్తున్నారు.

అయితే హోదా అంశం బాబు వల్లే పక్కకు పోయిందని, ప్యాకేజ్ ఒప్పుకోవడం వల్లే హోదా కనుమరుగైందని వైసీపీ నేతలు విమర్శిస్తున్నారు. కానీ ఇక్కడ బీజేపీ హోదా ఇవ్వలేము, ప్యాకేజ్ ఇస్తామని చెప్పాకే తాను ఒప్పుకున్నానని, అందుకే తర్వాత పోరాటాలు కూడా చేశామని అనే విషయాలని టీడీపీ నేతలు చెప్పడం లేదు. తమని డిఫెండ్ చేసుకోకుండా వైసీపీ మీద ఎటాక్ చేస్తున్నారు తప్పా, అసలు మేటర్ క్లియర్‌గా చెప్పే ప్రయత్నం చేయడం లేదు.