ఎం‌పి‌టి‌సి, జెడ్‌పి‌టి‌సి ఎన్నికలని బహిష్కరించిన టీడీపీ... ఇప్పుడు ఏపీ రాజకీయాల్లో ఇదే హాట్ టాపిక్. అదిరిపోయే మెజారిటీతో అధికారంలో ఉన్న వైసీపీకి చెక్ పెట్టడం సాధ్యం కాక బాబు, ఎం‌పి‌టి‌సి, జెడ్‌పి‌టి‌సి ఎన్నికల్లో చేతులెత్తేసినట్లు కనిపిస్తోంది. ఫలితాలు ఎలాగైనా రాని ఎలాగో పంచాయితీ, మున్సిపల్ ఎన్నికల్లో టీడీపీ పోటీ చేసింది. ఇలా పోటీ చేయడం వల్ల టీడీపీ కార్యకర్తల్లో కాస్త ధైర్యం పెరిగింది.

కానీ బాబు ఊహించని విధంగా ఎం‌పి‌టి‌సి, జెడ్‌పి‌టి‌సి ఎన్నికల్లో పోటీ చేయకూడదని డిసైడ్ అయిపోయారు. ఇక బాబు నిర్ణయంపై పార్టీలోనే భిన్నాభిప్రాయాలు వస్తున్నాయి. ఇక ఆ విషయం పక్కనబెట్టేస్తే, ఇప్పటికే వైసీపీ మంచి ఊపులో ఉంది. పంచాయితీ, మున్సిపల్ ఎన్నికల్లో అదిరిపోయే విజయాలని సొంతం చేసుకుంది. ఇక ఇప్పటికే ఎం‌పి‌టి‌సి, జెడ్‌పి‌టి‌సి ఎన్నికల్లో భారీగా ఏకగ్రీవాలు చేసుకుంది.

దీని బట్టి చూస్తే ఏప్రిల్ 8న జరగబోయే పరిషత్ ఎన్నికల్లో వైసీపీ హవా స్పష్టంగా ఉంటుందని అర్ధమవుతుంది. పైగా ఇప్పుడు టీడీపీ పోటీలో లేకపోవడం వైసీపీకి మరింత అడ్వాంటేజ్ వస్తుంది. టీడీపీ బలంగా ఉన్న స్థానాల్లో కూడా వైసీపీ జెండా ఎగురుతుంది. దీని వల్ల రాష్ట్రమంతా ఫ్యాన్ గాలి ఉంటుంది. ఒకవేళ టీడీపీలో పోటీలో ఉంటే కాస్త పరిస్తితి వేరుగా ఉండేది.

టీడీపీ బలంగా ఉన్న జిల్లాల్లో వైసీపీ గెలవడానికి కాస్త కష్టపడాల్సిన అవసరముండేది. ముఖ్యంగా కృష్ణా, గుంటూరు జిల్లాల్లో వైసీపీకి గెలుపు అంత సులువుగా వచ్చేది కాదు.   ఈ రెండు జిల్లాల్లో టీడీపీ బలంగానే ఉంది. మున్సిపల్ ఎన్నికల్లో దెబ్బతిన్నా సరే పరిషత్ ఎన్నికల్లో టీడీపీ పోరాడేది. ఎందుకంటే పట్టణ స్థాయిలో ఉన్న నాయకత్వం కంటే గ్రామ స్థాయిలో ఉన్న టీడీపీ నాయకత్వం బలంగా ఉంది. కానీ ఇప్పుడు పోటీలో లేకపోవడం వల్ల ఈ రెండు జిల్లాలో టీడీపీకి భారీ షాక్ తగలడం గ్యారెంటీ, ఈ రెండు జెడ్పీ పీఠాలు ఫ్యాన్ ఖాతాలోకే వెళ్లనున్నాయి.