తెలుగుదేశం పార్టీ ఆవిర్భవించి 40 ఏళ్ళు పూర్తయ్యాయి. అయితే ఈ 40 ఏళ్ల కాలంలో ఎన్నడూ లేని విధంగా ఆ పార్టీ అధినేత చంద్రబాబు అతి పెద్ద సంచలన నిర్ణయం తీసుకున్నారు. తొలిసారి ఎం‌పి‌టి‌సి, జెడ్‌పి‌టి‌సి ఎన్నికలని బహిష్కరిస్తున్నట్లు చంద్రబాబు చెప్పారు. అధికార వైసీపీ ఎన్నికల సమయంలో దౌర్జన్యాలకు పాల్పడుతుందని, తమ కార్యకర్తలని బాగా ఇబ్బంది పెడుతుందని, పైగా కొత్తగా వచ్చిన ఎలక్షన్ కమిషనర్ నీలం సాహ్ని పూర్తిగా జగన్ మనిషి అని విమర్శలు చేస్తూ, చంద్రబాబు ఎన్నికలని బహిష్కరిస్తున్నట్లు చెప్పారు.

అయితే గతేడాదే ఎం‌పి‌టి‌సి, జెడ్‌పి‌టి‌సి ఎన్నికల నామినేషన్ ప్రక్రియ ముగిసిపోయింది. అలాగే నామినేషన్స్ ఉపసంహరణ కార్యక్రమం కూడా ముగిసింది. ఏకగ్రీవాలని సైతం ప్రకటించేశారు. ఇక గతేడాది ఎన్నికలు ఎక్కడ ఆపేశారో అక్కడ నుంచే నీలం సాహ్ని ఎన్నికలు నిర్వహించాలని ఫిక్స్ అయ్యారు. అంటే అప్పుడు టీడీపీ అభ్యర్ధులు కూడా పోటీలో ఉంటారు. కానీ ఎన్నికలు బహిష్కరిస్తున్నందున ప్రచారం నిర్వహించక పోవచ్చు.

అంటే టీడీపీ అభ్యర్ధులు వైసీపీకి అసలు పోటీనే ఉండరు. ఇలా టీడీపీ సైడ్ అవ్వడం వైసీపీకి ఇంకా ఫుల్ అడ్వాంటేజ్. అందులో ఎలాంటి అనుమానం లేదు. ముఖ్యంగా టీడీపీ పోటీ నుంచి తప్పుకోవడం మంత్రి కొడాలి నానికి బాగా ప్లస్ అయ్యేలా ఉంది. ఎందుకంటే గుడివాడ నియోజకవర్గంలో కొడాలికి తిరుగులేదనే సంగతి తెలిసిందే. కానీ నియోజకవర్గంలో ఉన్న గుడ్లవల్లేరు మండలంలో వైసీపీకి పెద్ద బలం లేదు.

ఇక్కడ ఎప్పుడు టీడీపీకి అడ్వాంటేజ్ ఉంటుంది. ఈ మండలంలో ఎక్కువ సార్లు జెడ్‌పి‌టి‌సి స్థానాన్ని టీడీపీ కైవసం చేసుకుంది. ఇప్పుడు టీడీపీ తప్పుకోవడం వల్ల, వైసీపీ అభ్యర్ధికి ప్లస్ కానుంది. అయితే వైసీపీ తరుపున పోటీ చేసే గుడ్లవల్లేరు జెడ్‌పి‌టి‌సి అభ్యర్ధి ఉప్పాల హారికనే కృష్ణా జిల్లా జెడ్పీ చైర్ పర్సన్ అభ్యర్ధి కూడా. అంటే హారిక గుడ్లవల్లేరు జెడ్‌పి‌టి‌సి స్థానంలో సులువుగా గెలిచేసి, జెడ్పీ పీఠంలో కూర్చోవడం ఖాయంగా కనిపిస్తోంది. మొత్తానికైతే టీడీపీ పోటీ నుంచి తప్పుకోవడం కొడాలికి ఇంకా అడ్వాంటేజ్ కానుంది.