మాజీ మంత్రి అయ్యన్న పాత్రుడు...వయసు పెరిగేకొద్ది దూకుడు ప్రదర్శిస్తున్న నాయకుడు. దశాబ్దాల కాలం నుంచి టీడీపీలో రాజకీయాలు చేస్తున్న అయ్యన్న, అధికార వైసీపీ అంటే చాలు ఒంటికాలి మీద వెళ్తారు. టీడీపీలో ఎవరు మాట్లాడినా, మాట్లాడకపోయినా అయ్యన్న మాత్రం జగన్‌పై విమర్శలు చేస్తూనే ఉంటారు. అలాగే వైసీపీ నేతలపై విరుచుకుపడుతుంటారు. తాజాగా అయ్యన్న, మంత్రి పేర్ని నానిపై విరుచుకుపడ్డారు.

రాష్ట్ర మంత్రి పేర్ని నాని ఒక కామిడీ పీస్ అని, పుదుచ్చేరికి హోదా ప్రకటించిన బీజేపీపై రాష్ట్రంలో రంకెలు వేస్తున్నట్టు నటించడం కాదని, నేరుగా తాడేపల్లి వెళ్లి జగన్ రెడ్డిని నిలదీయాలన్నారు. బీజేపీ మిత్రపక్షాలను గెలిపించాలంటూ.. పుదుచ్చేరిలో వైసీపీ మంత్రులు ఎందుకు ప్రచారం చేస్తున్నారో నిలదీయాలని, ఏపీలో డ్రామా... పుదుచ్చేరిలో ప్రేమ అంటే కుదరదు ఆర్టిస్ట్ అంటూ పేర్నిపై సెటైర్లు వేశారు.

అయితే పుదుచ్చేరిలో బీజేపీ మిత్రపక్షాల కోసం పలువురు వైసీపీ నేతలు ఎన్నికల ప్రచారం నిర్వహించిన విషయం తెల్సిందే. ఇక ఇక్కడే అసలు ట్విస్ట్ చోటుచేసుకుంది. ఏపీకి ప్రత్యేక హోదా ఇవ్వడం కుదరదని చెప్పిన బీజేపీ, పుదుచ్చేరికి హోదా ఇస్తామని ఎన్నికల మేనిఫెస్టోలో పెట్టింది. ఇదే విషయంపై ఏపీ వైసీపీ, టీడీపీ ఫైర్ అవుతున్నాయి. దీనిపై మంత్రి పేర్ని నాని కూడా స్పందిస్తూ, ఎన్నికల కోసం బీజేపీ ఎన్ని హామీలైన ఇస్తుందని, గతంలో బీహార్‌కు లక్ష కోట్లు ఇస్తామని ఎన్నికల సమయంలో చెప్పిన విషయం తెలిసిందే అని, అయితే ఆ తర్వాత ఒక్క రూపాయి కూడా ఇవ్వలేదని నాని మండిపడ్డారు.

ఇప్పుడు పుదుచ్చేరికి ప్రత్యేక హోదా నినాదంతో బీజేపీ ఎన్నికలకు వెళ్తోందని, పుదుచ్చేరికి ఇస్తామని చెప్పినపుడు ఏపీకి ఎందుకు ఇవ్వకూడదని ప్రశ్నించారు. అయితే అదే బీజేపీ కోసం ఏపీ వైసీపీ నేతలు పుదుచ్చేరిలో ప్రచారం చేస్తున్నారు. ఇదే విషయంపై అయ్యన్న మాట్లాడుతూ, నాని పెద్ద కామెడీ పీస్ అని సెటైర్ వేశారు. ఏదేమైనా ఏపీలో రాజకీయాలు ఎవరికీ అంతు చిక్కవు.