సాధారణంగా రాజకీయాల్లో విమర్శలకు, ప్రతి విమర్శలు ఉంటాయి. అయితే ఈ విమర్శలు ఎప్పుడు నిర్మాణాత్మకంగానే ఉండాలి. హాద్దులు దాటి విమర్శలు చేసుకుంటే రాజకీయం చాలా ఎబ్బెట్టుగా ఉంటుంది. అయితే ప్రస్తుతం ఏపీలో ఇలాంటి రాజకీయమే నడుస్తోంది. అసలు విమర్శలు అంటే బూతులు అన్నట్లుగానే పరిస్థితులు ఉన్నాయి. అధికార పార్టీ, ప్రతిపక్ష పార్టీ అని తేడా లేకుండా బూతులు తిట్టుకోవడమే పనిగా పెట్టుకుని నాయకులు ముందుకెళుతున్నారు.

అయితే బూతుల విషయంలో అందరూ మంత్రి కొడాలి నానీనే టార్గెట్ చేస్తున్నారు. నాని మంత్రి అయిన దగ్గర నుంచి ప్రతిపక్ష నాయకుడు చంద్రబాబుపై ఎలాంటి విమర్శలు చేస్తున్నారో అందరికీ తెలిసిందే. అలాగే నారా లోకేష్, పలువురు టీడీపీ నేతలపై నాని తీవ్రంగానే విరుచుకుపడుతున్నారు. ఇక ఇలా నాని మాట్లాడటం కరెక్ట్ కాదనే చెప్పొచ్చు. ఎందుకంటే రాజకీయాల్లో ఇలాంటి విమర్శలు సరికావు.

కాకపోతే ఇలా విమర్శలు చేయకపోతే చంద్రబాబు బ్యాచ్ ఆగరని నాని అంటున్నారు. అలాగే స్థానికంగా తమ బాష ఇలాగే ఉంటుందని చెప్పుకొస్తున్నారు. ఇక నాని ఇలా పదే పదే మాట్లాడుతుండటంతో రాష్ట్ర ప్రజలకు కూడా ఇలాంటి విమర్శలు సాధారణమైపోయాయి. ఇదే సమయంలో కొడాలి  నానికి కౌంటర్లు ఇచ్చే టీడీపీ నేతలు కూడా బూతులే మాట్లాడుతున్నారు. ఆఖరికి చంద్రబాబు, లోకేష్‌లు సైతం ఇదే పంథాలో వెళుతున్నారు.

అంటే నాని బట్టే టీడీపీ నాయకులు కూడా బూతులు మాట్లాడేస్తున్నారు. అందుకే ప్రజలు సైతం ఇలాంటి విమర్శలని పెద్దగా పట్టించుకోవడం లేదు. ఇక ఈ మాటలన్నీ కామన్ అని వదిలేస్తున్నారు. అదే నాని ఒక్కరే మాట్లాడి, టీడీపీ నేతలు మాట్లాడకుండా ఉంటే పరిస్తితి వేరేగా ఉండేది.

నానికి తగ్గట్టుగానే తెలుగు తమ్ముళ్ళు కూడా మాట్లాడుతున్నారు కాబట్టి, నేటి రాజకీయాల్లో బూతులు సర్వ సాధారణమైపోయాయి. ఇక ఇలా మాట్లాడటం వల్ల ఒకరికి ప్లస్, ఒకరికి మైనస్ అంటూ అయ్యే పరిస్థితులు ఏమి లేవు.