സാൻ മറിനോയെ ഗോൾ മഴയിൽ മുക്കി ഇംഗ്ലണ്ട്

ലോകകപ്പ് യോഗ്യത റൗണ്ടിൽ ഇംഗ്ലണ്ടിന് തകർപ്പൻ വിജയം. ദുർബലരായ സാൻ മറിനോയെ എതിരില്ലാത്ത അഞ്ചു ഗോളുകൾക്കാണ് ഇംഗ്ലണ്ട് തകർത്തത്. സൗത്ഗേറ്റിന്റെ ടീമിനെതിരെ വെല്ലുവിളി ഉയർത്താൻ പോലും സാൻ മറിനോയ്ക്ക് ആയില്ല. കളിയുടെ ആധിപത്യം മുതലെടുത്ത ഇംഗ്ലണ്ട് ഫിനിഷിങ് മെച്ചപ്പെടുത്തിരുന്നെങ്കിൽ സാൻ മറിനോയെ വലിയ സ്കോറിന് പരാജയപ്പെടുത്താമായിരുന്നു.

14 -ാം മിനുട്ടിൽ വാർഡ് പ്രോസാണ് ഇംഗ്ലണ്ടിന്റെ സ്കോർ ബോർഡ് തുറന്നത്. വാർഡ് പ്രോസിന്റെ ഇംഗ്ലണ്ടിനായുള്ള ആദ്യ ഗോളായിരുന്നു സാൻ മറിനോക്കെതിരെ നേടിയത്. 21, 53 മിനിറ്റുകളിൽ എവർട്ടൺ സ്‌ട്രൈക്കർ കാൾവട്ട് ലൂയിൻ ഇംഗ്ലണ്ടിനായി ഇരട്ട ഗോൾ നേടി. ദേശീയ ടീമിനായി ആറ് മത്സരങ്ങളിൽ നിന്ന് 4 ഗോളുകൾ ഇതിനോടകം ലൂയിൻ തന്റെ കരിയറിൽ കുറിച്ചു. സ്റ്റെർലിങ് (31), വാറ്റ്കിൻസ്‌ (83) എന്നിവരുടെ ഗോളിൽ ഇംഗ്ലണ്ട് ജയം ഉറപ്പിച്ചു.