హెరాల్డ్ ఎడిటోరియల్ : జగన్ కు జరిగిందే చంద్రబాబుకూ జరుగుతుందా ?

జగన్ పైన మోపిన కేసుల్లో మంత్రులకు సంబంధం లేదు. పోనీ ఐఏఎస్ అధికారులకు సంబంధం ఉందా అంటే అదీ తేలలేదు. క్విడ్ ప్రోకో అనే పదాన్ని మొదటసారి దర్యాప్తు సంస్ధతో పాటు ఎల్లోమీడియా కూడా బాగా ప్రాచుర్యంలోకి తెచ్చింది. పోనీ ఒక్క కేసులో అయినా క్విడ్ ప్రోకో పద్దతిని రుజువు చేశారా అంటే ఇంతవరకు జరగలేదు. పోనీ జగన్ వల్ల తాము నష్టపోయామని ఎవరైనా ఫిర్యాదు చేశారా అంటే అదీలేదు. 2004-09 మధ్యలో జరిగిన వ్యవహారాలకు సంబంధించి ఎవరికీ బాధ్యత లేదు. ఎవరు అవినీతికి పాల్పడినట్లు రుజువుల్లేవు. మరి మంత్రులకు సంబంధం లేక, పోనీ ఐఏఎస్ అధికారుల ఇన్వాల్వ మెంటూ లేకపోతే ఏ విధమైన అధికార పదవుల్లో లేని జగన్ అవినీతికి ఎలా పాల్పడ్డాడు ? అన్నదే ఆశ్చర్యం.

సరే ఆ విషయాన్ని వదిలేస్తే ఇఫుడు చంద్రబాబుకు సీఐడీ నోటీసులిచ్చింది. అదికూడా అమరావతి ప్రాంతంలో  అసైన్డ్ భూముల కుంభకోణం ఆరోపణలపై. ఎస్సీ, ఎస్టీలకు అప్పుడెప్పుడో ప్రభుత్వం కేటాయించిన అసైన్డ్ భూములను చంద్రబాబునాయడు ప్రభుత్వం ల్యాండ్ పూలింగ్ లో స్వాధీనం చేసుకున్నది. ఇందులో ఆరోపణలకన్నా వాస్తవమే ఎక్కువుంది. ఎందుకంటే అసైన్డ్ భూములను తీసుకునే హక్కు ఎవరికీ లేదు. చివరకు ముఖ్యమంత్రి స్ధాయిలో కూడా అసైన్డ్ భూములను తీసుకునేందుకు నిర్ణయం చేసేందుకు లేదు. అసైన్డ్ భూముల విషయంలో మినహాయింపులు, సడలింపులు చేయాలంటే అది రాష్ట్రపతి మాత్రమే చేయగలరు. కాబట్టి ఈ విషయంలో చంద్రబాబును జగన్ సర్కార్ గట్టిగానే తగులుకునేట్లుంది. మరి చివరకు ఏమి జరుగుతుందో చూడాలి.