వార్డుల వారీగా విభజించి మరీ ఓటర్లకు గూగుల్ పే, ఫోన్ పే నెంబర్ లు తీసుకుని వారికి డబ్బు పంపిణీ చేసే ప్రక్రియ మొదలు పెట్టారు. అనంతపురం జిల్లాలోని అనంతపురం కార్పొరేషన్ తో పాటు ధర్మవరం, తాడిపత్రి, గుంతకల్లు, గుత్తి, రాయదుర్గం, కళ్యాణదుర్గం, హిందూపురం, కదిరి మున్సిపాలిటీలు అలాగే మడకశిర, పుట్టపర్తి నగర పంచాయతీల పరిధిలో ఇదే వ్యూహాన్ని అమలు చేస్తున్నట్లు చెబుతున్నారు. ఇక్కడ మరీ ముఖ్యంగా అధికార పార్టీకి చెందిన నేతలు ఇలాంటి వాటికి ఎక్కువగా పాల్పడుతున్నట్లు గా ప్రచారం జరుగుతోంది. టీడీపీ నేతలు కూడా తృణమో పణమో చేతిలో పెట్టి ఓటర్లను ప్రసన్నం చేసుకునే పనిలో ఉన్నారని తెలుస్తోంది. 

అలాగే అధికార పార్టీ నేతలు ఓట్లు కొనుగోలు చేసేందుకు కోట్లాది రూపాయలు సిద్ధం చేసుకున్నట్లు ప్రచారం జరుగుతోంది. అనంతపురం జిల్లా కర్ణాటక సరిహద్దులో ఉండడంతో అక్కడ నుంచి మద్యం పెద్ద ఎత్తున తెప్పించి పంపిణీ చేస్తున్నట్లు ప్రచారం జరుగుతోంది. అదీకాక జిల్లాకు చెందిన యువత ఎక్కువగా బెంగళూరు, హైదరాబాద్ వంటి నగరాల్లో ఉద్యోగాలు చేస్తూ ఉంటారు. వారందరినీ బస్సులు పెట్టి మరి మున్సిపాలిటీలకు రప్పించి ఓట్లు వేయించుకునే పరిస్థితి కనిపిస్తోంది. అయితే పోలీసులు కూడా వీటిని అడ్డుకట్ట వేయడానికి చాలా గట్టిగా ప్రయత్నాలు చేస్తున్నారు.కానీ అభ్యర్థుల తెలివితేటల ముందు పోలీసులు తేలిపోతున్నారు అనేది మాత్రం చెప్పక తప్పదు.