రాయదుర్గంలో పొరాళు వంశానికి చెందిన అన్నదమ్ములు పొరాళు గోవిందరాజులు వైసీపీ తరపున, పొరాళు ధనార్జున టీడీపీ నుంచి పోటీ చేస్తున్నారు. అలానే పొరాళు పురుషోత్తం టీడీపీ తరఫున 6వ వార్డులో, ఆయన భార్య గౌరి టీడీపీ తరఫున 9వ వార్డులో పోటీ చేస్తున్నారు. 5వ వార్డులో ఇద్దరు స్నేహితులు వేర్వేరు పార్టీ నుంచి పోటీ చేసి అదృష్టాన్ని పరీక్షించుకుంటున్నారు. గత ఎన్నికల్లో మహబూబ్‌బాషా టీడీపీ తరఫున గెలుపొందగా ఆయనపై పోటీకి దిగిన వలి బాషా వైసీపీ నుంచి ఎలాగైనా గెలవాలని చూస్తున్నారు. అలాగే రాయదుర్గంలో పిన్ని ఒక పార్టీ నుండి కొడుకు మరో పార్టీ నుంచి పోటీ చేయడం ఆసక్తికరంగా మారింది. 

మాజీ ఎమ్మెల్యే బండి హులికుంటప్ప తమ్ముడు బండి సుధాకర్‌ భార్య, మున్సిపల్‌ మాజీ కౌన్సిలర్‌ బండి భారతి టీడీపీ తరఫున 11వ వార్డులో పోటీ చేస్తుండగా బండి హులికుంటప్ప మరో సోదరుడు బండి రామమూర్తి కుమారుడు బండి అజయ్‌ కుమార్‌ 12వ వార్డులో వైసీపీ నుంచి బరిలో నిలిచారు. గతంలో తమ పిన్ని గెలుపునకు కృషి చేసిన అజయ్‌ ప్రస్తుతం మరో పార్టీ తరుపున పోటీ చేస్తూ తనను గెలిపించామని కోరుతున్నారు. అనంతరపురం కార్పోరేషన్  33వ డివిజన్‌లో దాయాదుల మధ్య పోరు నెలకొంది. వైసీపీ అభ్యర్థి సాకే చంద్రశేఖర్‌, టీడీపీ అభ్యర్థి సాకే జయప్ప మధ్య పోటీ నెలకొంది. వారిద్దరూ ఒకే వంశానికి చెందిన వారు కావడం ఆసక్తికరంగా మారింది.