ఈరోజు నుంచి హిందూపురం మున్సిపాలిటీలో బాలకృష్ణ ప్రచారం చేయడానికి సిద్ధం అయ్యారు.  మోత్కుపల్లి, విద్యానగర్, బోయ పేట, నింకంపల్లి, మేలపురం, విజయనగర్ కాలనీ, ముదిరెడ్డిపల్లి, సింగిరెడ్డి పల్లి ప్రాంతాల్లో బాలకృష్ణ మొదటిరోజు ప్రచారం చేయబోతున్నారు. నిజానికి  హిందూపురం అంటే టీడీపీకి కంచుకోట. పార్టీ ఆవిర్భావం నుంచి ఓటమి ఎరుగని ప్రాంతం. అంతకు మించి అంటే నందమూరి ఫ్యామిలీ అడ్డా. అప్పటి ఎన్టీఆర్ నుంచి నేటి బాలయ్య వరకు నందమూరి ఫ్యామిలీని ఆదరిస్తున్నారు. కానీ మొన్న జరిగిన పంచాయతీ ఎన్నికల్లో మాత్రం టీడీపీకి కోలుకోలేని రిజల్ట్స్ వచ్చాయి. 

అందుకే బాలయ్య లైన్ లోకి వచ్చారు. హిందూపురం మునిసిపాలిటీలో మొత్తం 38 వార్డులు ఉన్నాయి. గత ఎన్నికల్లో 19 స్థానాల్లో టీడీపీ, 19 స్థానాల్లో వైసీపీ అభ్యర్థులు గెలిచారు. అప్పట్లో ఎమ్మెల్యే, ఎమ్మెల్సీ ఓట్లతో చైర్మన్ స్థానాన్ని టీడీపీ కైవసం చేసుకుంది. గతంలో పరిస్థితి ఇలా ఉంటే.. ఇప్పుడు వైసీపీ అధికారంలో ఉంది. దీంతో ఈసారి కూడా గెలిచి చైర్మన్ స్థానాన్ని సంపాదించడానికి వైసీపీకి బలంగా ఉన్న 19 వార్డులను ఎంచుకుని ప్రచారం చేసేందుకు సిద్ధమవుతున్నారు. ఎందుకంటే ప్రస్తుతం వైసీపీ బలంగా ఉన్నా ఎమ్మెల్సీ ఇక్బాల్, నవీన్ నిశ్చల్ మధ్య విబేధాలతో దానిని అనుకూలంగా మలుచుకోవాలని చూస్తున్నారు.