మార్చి 10వ తేదీన ఎన్నికలు జరుగుతుండగా 14 వ తేదీన రిజల్ట్స్ ప్రకటిస్తారు. జిల్లాలో అనంతపురం కార్పొరేషన్ అలాగే హిందూపురం ధర్మవరం, కదిరి, తాడిపత్రి, కళ్యాణదుర్గం, రాయదుర్గం, గుంతకల్లు, గుత్తి మున్సిపాలిటీలలో ఎన్నికలు జరుగుతున్నాయి. అలాగే మడకశిర, పుట్టపర్తి నగర పంచాయతీలలో కూడా ఈ ఎన్నికలు నిర్వహించనున్నారు. అయితే పామిడి మేజర్ పంచాయతీ కావాలని డిమాండ్ చేస్తున్న క్రమంలో అక్కడ ఎన్నికలు జరగడం లేదు. అనంతపురం జిల్లా వ్యాప్తంగా మునిసిపల్ ఎన్నికల బరిలో 2280 మంది అభ్యర్థులు ఉన్నారు. 

అయితే నామినేషన్ ఉపసంహరణకు ఇంకా గడువు ఉండడంతో చివరికి ఎంత మంది బరిలో ఉంటారు అనేది చూడాల్సి ఉంది. అయితే ఇప్పటికీ అనంతపురం జిల్లా విషయానికి వస్తే దాదాపుగా అధిక భాగం వైసిపి ఎమ్మెల్యేలే ఉన్నారు. మరీ ముఖ్యంగా ఇప్పుడు ఎన్నికలు జరుగుతున్న అనంతపురం కార్పొరేషన్ కి సంబంధించిన అర్బన్ ఎమ్మెల్యేగా వైసీపీకి చెందిన అనంత వెంకట రామి రెడ్డి ఎమ్మెల్యే గా ఉన్నారు. 

అలాగే ధర్మవరానికి కేతిరెడ్డి వెంకట్రామిరెడ్డి, అలాగే పుట్టపర్తి విషయానికి వస్తే దిద్దుకుంట శ్రీధర్ రెడ్డి, కదిరికి పీ వీ సిద్ధారెడ్డి, రాయదుర్గంకి కాపు రామచంద్రారెడ్డి, తాడిపత్రి కేతిరెడ్డి పెద్దారెడ్డి, కళ్యాణదుర్గం ఉష శ్రీ చరణ్, మడకశిర తిప్పేస్వామి ఇలా వీరంతా వైసీపీ తరుపున ఎమ్మెల్యేలుగా గెలిచి ఉన్నారు. ప్రస్తుత ఎన్నికలకు సంబంధించి హిందూపురం ఎమ్మెల్యే బాలకృష్ణ ఒక్కరే టిడిపి తరఫున ఉన్నారు. దీంతో ఆయా చోట్ల వైసీపీ ప్రభావం గట్టిగానే కనిపించే అవకాశం ఉందని అంటున్నారు. చూడాలి మరి ఏమవుతుందో ?