నిజానికి కథ ప్రకారం ఈ సినిమాలో హీరో క్రైస్తవ మతానికి చెందిన వ్యక్తి. అతని పేరు కూడా ఆశీర్వాదం అని ఉంటుంది. ఇక హీరోయిన్ హిందూ మతానికి చెందిన వ్యక్తి. ఈ ఇద్దరూ ప్రేమలో పడటం ఆ తర్వాత జరిగిన పరిణామాల నేపథ్యంలో ఈ సినిమా ఉంటుంది. అయితే ఈ ఇద్దరు ప్రేమించుకోవడం ఆ తర్వాత జరిగిన పరిణామాలను చూపెట్టే క్రమంలో అనేక చోట్ల హిందూ దేవుళ్లను కావాలనే కించపరిచారంటూ హిందూ సంఘాలకు చెందిన వారు చాలా మంది కామెంట్లు చేయడం ఇప్పుడు సినిమా యూనిట్ కి కొత్త తలనొప్పిగా మారింది. 

అయితే మరి ఈ అంశం మీద సినిమా యూనిట్ ఏ మేరకు స్పందిస్తుంది అనేది ఆసక్తికరంగా మారింది. ఈ సినిమాని టాలీవుడ్ లో ఉన్న లీడింగ్ ఎంటర్టైన్మెంట్ బ్యానర్ అయిన మైత్రి మూవీ మేకర్స్ నిర్మించగా గతంలో సుకుమార్ వద్ద దర్శకత్వ శాఖలో పనిచేసిన బుచ్చిబాబు అనే దర్శకుడు తెరకెక్కించారు. తుళు భామ కృతి శెట్టి నటించిన ఈ సినిమా మిశ్రమ స్పందన తెచ్చుకుంటోంది. అయితే దేవిశ్రీ ప్రసాద్ అందించిన సంగీతం మాత్రం సినిమాకి చాలా ప్లస్ అయింది అని చెప్పవచ్చు.