అనంతరం సోము వీర్రాజు, పురందేశ్వరి మీడియాతో మాట్లాడారు. విశాఖ ఉక్కు కర్మాగారం ప్రైవేటీకరణను ఆంధ్రులు వ్యతిరేకిస్తున్నారని.. ప్రజల మనోభావాలను పరిరక్షించాల్సిన అవసరముందని కేంద్ర మంత్రికి తెలిపినట్లు సోమువీర్రాజు చెప్పారు. అలాగే ఉక్కు కర్మాగారం పరిరక్షణకు ఉన్న ప్రత్యామ్నాయ అంశాలను కేంద్ర మంత్రికి వివరించినట్లు తెలిపారు. బ్యాంకుల విలీనం తరహాలోనే స్టీల్‌ప్లాంట్‌ విలీనం ప్రతిపాదనలను కేంద్ర మంత్రి ధర్మేంద్ర దృష్టికి తీసుకెళ్లామని వెల్లడించారు. అలాగే రాష్ట్ర రాజకీయ పరిస్థితులు, పార్టీల ఆందోళనలను కేంద్రానికి వివరించినట్లు సోము వీర్రాజు పేర్కొన్నారు. కేంద్ర హోంమంత్రి అమిత్ షా, బీజేపీ జాతీయ అధ్యక్షుడు జేపీ నడ్డా సహా పలువురు ముఖ్య నేతలను కలిసి ఉక్కు కర్మాగారం విషయంలో ప్రజల మనోభావాలను వివరిస్తామని తెలిపారు.

పురందేశ్వరి మాట్లాడుతూ... విశాఖ ఉక్కు కర్మాగారం ప్రైవేటీకరణకు పలు ప్రత్యామ్నాయాలు సూచించామన్నారు. సెయిల్‌, ఎన్‌ఎండీసీలో విలీన ప్రతిపాదనలు చేశామని చెప్పారు. ఈ విషయంలో కేంద్ర ప్రభుత్వం సరైన నిర్ణయం తీసుకుంటుందని ఆమె ఆశాభావం వ్యక్తం చేశారు. అలాగే ఉక్కు కర్మాగారం ఉద్యోగుల శ్రేయస్సును పరిరక్షించాలని కేంద్ర మంత్రిని కోరినట్లు పురందేశ్వరి తెలిపారు. కాగా, విశాఖపట్నం ఉక్కు పరిశ్రమ ప్రైవేటీకరణపై అన్ని వైపుల నుంచి వ్యతిరేకత వస్తున్న నేపథ్యంలో ఏపీ బీజేపీ కొత్త ప్రతిపాదన తీసుకురావడం గమనార్హం. బ్యాంకుల తరహాలో మరో కేంద్ర ప్రభుత్వ సంస్థలో విశాఖ ఉక్కు పరిశ్రమను విలీనం చేయాలని కోరారు.