అసదుద్దీన్ ఓవైసీ వ్యాఖ్యలను కేంద్ర హోం శాఖ సహాయ మంత్రి కిషన్ రెడ్డి కొట్టిపారేశారు. హైదరాబాద్‌ను యూటీగా మార్చే యోచన కేంద్రానికి లేదన్నారు. హైదరాబాద్ ప్రజానీకాన్ని తప్పుదోవ పట్టించేలా టీఆర్ఎస్, ఎంఐఎం ప్రచారం చేస్తున్నాయని ఆయన మండిపడ్డారు. కాగా బీజేపీ ఆలోచననే ఓవైసీ బయటకు చెప్పారంటూ కాంగ్రెస్ నేత, మాజీ మంత్రి షబ్బీర్ అలీ ఆరోపించారు. హైదరాబాద్ లేకపోతే తెలంగాణ ఆదాయాన్ని కోల్పోతుందన్నారు. ఈ కారణంతోనే హైదరాబాద్‌తో కూడిన తెలంగాణను యూపీఏ సర్కారు రాష్ట్రంగా ఏర్పాటు చేసిందన్నారు. హైదరాబాద్‌ను యూటీ చేస్తే ఊరుకునేది లేదన్నారు. హైదరాబాద్‌ను కేంద్రపాలిత ప్రాంతంగా మారుస్తారని ప్రచారం జరగడం ఇదే తొలిసారి కాదు. రాష్ట్ర విభజనకు ముందు ఈ ప్రచారం జరిగింది. తెలంగాణ వచ్చాక కూడా భాగ్యనగరాన్ని మోదీ సర్కారు యూటీ చేస్తుందనే టాక్ వినిపించింది. తెలంగాణలో బలపడాలని బీజేపీ భావిస్తోన్న వేళ.. హైదరాబాద్‌ను యూటీ చేస్తారంటూ ప్రచారం జరుగుతుండటం గమనార్హం. రాష్ట్రంలో పాగా వేయాలని భావిస్తోన్న కాషాయ పార్టీకి.. భాగ్యనగరాన్ని కేంద్ర పాలిత ప్రాంతంగా మార్చడం వల్ల రాజకీయంగా నష్టం వాటిల్లడమే తప్పితే ఒరిగేది ఏముండదు. బంగారు బాతుల్లాంటి నగరాలను వదులుకొని ఆయా రాష్ట్రాలు మనుగడ సాగించలేవనే సంగతి తెలిసిందే.