‘‘అమిత్‌ షా బీజేపీ జాతీయ ప్రధాన కార్యదర్శిగా ఉన్నప్పుడు ఒకసారి మన రాష్ట్రానికి అతిథిగా వచ్చారు. ఆ సమయంలో మనలో ఒకరు.. నాకు తెలిసి అజయ్‌ జమ్‌వాల్‌ (ఈశాన్య జోనల్‌ బీజేపీ సెక్రటరీ) అనుకుంటా.. ఆయనతో ‘ఇప్పటికే దేశంలోని పలు రాష్ట్రాల్లో బీజేపీ అధికారంలోకి వచ్చింది. అందుకు అభినందనలు తెలుపుతున్నా’ అన్నారు. అందుకు అమిత్‌ షా బదులిస్తూ ‘శ్రీలంక, నేపాల్‌ మిగిలి ఉన్నాయి. పార్టీని అక్కడ కూడా విస్తరించి బీజేపీని అధికారంలోకి తీసుకురావాలి’ అన్నారు’’ అంటూ సీఎం విప్లవ్‌ కుమార్ దేవ్‌ చెప్పుకొచ్చారు. త్రిపుర రాజధాని అగర్తలాలో ఏర్పాటు చేసిన ఓ కార్యక్రమంలో మాట్లాడుతూ.. విప్లవ్‌ దేవ్‌ ఈ వ్యాఖ్యలు చేశారు. కేంద్ర బడ్జెట్‌లో తమ రాష్ట్రానికి చేసిన కేటాయింపులకు గాను ధన్యవాదాలు తెలపడానికి ఆ కార్యక్రమాన్ని ఏర్పాటు చేశారు. 

శ్రీలంక, నేపాల్‌లో బీజేపీ విస్తరణ కార్యక్రమాన్ని మన సీఎం విప్లవ్ కుమార్ దేవ్ ‘ఆత్మనిర్భర్ సౌత్ ఏసియా’గా అభివర్ణించారు. ప్రధాని నరేంద్ర మోదీ గత కొంతకాలంగా ‘ఆత్మనిర్భర భారత్’ పదాన్ని వినిపిస్తున్న సంగతి తెలిసిందే. భారత్ అన్ని రంగాల్లో స్వయం సంవృద్ధి సాధించాలనే ఉద్దేశంతో ప్రధాని దాని గురించి ప్రస్తావిస్తున్నారు. త్రిపుర ముఖ్యమంత్రి దాన్ని మరో శిఖరానికి తీసుకెళ్లి, దక్షిణాసియా దేశాల వరకు విస్తరించారన్నమాట. అందుకు తగిన వివరణ కూడా ఇచ్చారు. ‘సబ్ కా సాత్, సబ్ కా వికాస్ (అందరికీ అభివృద్ధి ఫలాలు) నినాదంతో నరేంద్ర మోదీ ప్రభుత్వం పనిచేస్తోంది. కేంద్రం ఇటీవల ప్రవేశపెట్టిన పాలసీలు, బడ్జెట్.. బంగ్లాదేశ్, భూటాన్, నేపాల్ దేశాలకు కూడా ప్రయోజనం చేకూర్చేవిధంగా ఉన్నాయి. అసలు 2014లో కేంద్రంలో ప్రభుత్వం ఏర్పాటు చేసిన వెంటనే మోదీ చేసిన పనేంటో తెలుసా.. సార్క్ దేశాధ్యక్షులందరినీ ఆహ్వానించి సమావేశమయ్యారు. వీరిలో పాకిస్థాన్ అధ్యక్షుడు కూడా ఉన్నారు’ అని సీఎం విప్లవ్ దేవ్ చెప్పుకొచ్చారు. దీన్ని బట్టే మోదీ విశాల దృక్పథాన్ని అర్థం చేసుకోవచ్చునంటూ విప్లవ్ దేవ్ తన వ్యాఖ్యలను సమర్థించుకున్నారు. భారత్ తన దాయాది దేశాలతో కలిసి ఎదగాలని కోరుకుంటోందని ఆయన వివరించారు. పనిలో పనిగా కేరళ ఎన్నికల పైనా తనదైన శైలిలో వివరణ ఇచ్చారు. ‘కేరళలో గత కొన్నేళ్లుగా పాతుకుపోయిన పాత సంప్రదాయాన్ని బీజేపీ మార్చనుంది. ఇప్పటిదాకా కేరళలో ఐదు సంవత్సరాలు కాంగ్రెస్‌ అధికారంలో ఉంటే.. తర్వాతి ఐదేళ్లు లెఫ్ట్‌ అధికారంలో ఉండేది. బీజేపీ ఈ పద్దతిని మార్చనుంది. త్వరలోనే దక్షిణాది రాష్ట్రాల్లో పార్టీ పాగా వేయనుంది’ అని విప్లవ్ దేవ్ అన్నారు.