ఈ సందర్భంగా ఆయన మాట్లాడుతూ... ఆంధ్రులకు అన్యాయం జరిగితే ఉపేక్షించేది లేదని లోకేశ్‌ స్పష్టం చేశారు. విశాఖ స్టీల్ ప్లాంట్‌ ప్రైవేటీకరణను అడ్డుకోలేని సీఎం.. ప్రత్యేక హోదా సాధిస్తారా అని లోకేశ్ ప్రశ్నించారు. స్టీల్‌ ప్లాంట్‌ ప్రైవేటీకరణకు వ్యతిరేకంగా కలిసికట్టుగా పోరాడుదామని పిలుపునిచ్చారు. టీడీపీ హయాంలో విశాఖకు అదాని డేటా సెంటర్‌ తీసుకువచ్చామని, అలాంటిది వైఎస్ఆర్సీపీ హయాంలో ఒక్క ఐటీ పరిశ్రమ అయినా తీసుకువచ్చారా? అని నిలదీశారు. ఇక్కడ ఉన్న పరిశ్రమలను వెనక్కి పంపించేందుకు ప్రయత్నాలు చేస్తున్నారని ఆరోపించారు. ‘151 మంది ఎమ్మెల్యేలు, 22 మంది ఎంపీలు ఉండి జగన్ ఏం సాధించారు.. గాడిదలు కాస్తున్నారా? జగన్ గన్ అన్నారు.. కాకపోతే అది బుల్లెట్ లేని గన్ అని.. నొక్కితే నీళ్లు బయటకు వస్తున్నాయి’ అని ఎద్దేవా చేశారు. ప్రైవేటీకరణపై కేంద్రానికి సీఎం లేఖ రాశారన్నారని, ఢిల్లీలో అడిగితే లేటర్ రాలేదని చెబుతున్నారని దుయ్యబట్టారు.

ప్రశాంతతకు మారుపేరైన విశాఖలో ప్రశాంతతే లేకుండా పోయిందని విమర్శించారు. ఆదివారం వస్తే ఏ ఇల్లు పగలగొడతారో, ఏ గోడ కూలదోస్తారనే భయంతో జనం బతుకుతున్నారని దుయ్యబట్టారు. జగన్ తల్లి విజయలక్ష్మీని లక్షా యాభైవేల ఓట్లతో ఓడించారు కాబట్టి విశాఖపై కక్ష తీర్చుకోవాలనే ఉక్కు ఫ్యాక్టరీని ప్రయివేటీకరణకు సహకరిస్తున్నారని అన్నారు. పార్లమెంట్‌లో ట్వీట్ రెడ్డిగారు ఓ ప్రశ్న అడగడంతో వారి రహస్య ఒప్పందం బయటపడిందని పరోక్షంగా విజయసాయిరెడ్డిపై విమర్శలు గుప్పించారు. విశాఖలో స్టీల్‌ ప్లాంట్‌ భూముల విలువ దాదాపు రూ.2లక్షల కోట్లు ఉంటుందని దొడ్డిదారిన వాటిని కొట్టేసేందుకు జగన్‌ ప్రయత్నిస్తున్నారని ఆరోపించారు. ప్రజలకు అండగా నిలబడతామని చెప్పేందుకు జగన్‌కు ధైర్యం లేదన్నారు. పల్లా శ్రీనివాసరావు ఆమరణ నిరాహార దీక్ష చేస్తున్నా ప్రభుత్వంలో కదలిక రాలేదని, వైఎస్‌ఆర్సీపీ నేతలు మాయమాటలు చెబితే ప్రజలు నమ్మే స్థితిలో లేరు అని లోకేశ్‌ అన్నారు.