తూర్పు లడఖ్‌లోని ప్యాంగాంగ్‌ సరస్సు ఉత్తర, దక్షిణ భాగాల నుంచి చైనా, భారత్‌ బలగాల ఉపసంహరణ నేటి నుంచి ప్రారంభమైందని చైనా రక్షణ మంత్రిత్వ శాఖ అధికార ప్రతినిధి యూ కియాన్‌ తెలిపారు. తొమ్మిదో రౌండ్‌ కమాండర్‌ స్థాయి చర్చల్లో ఇరు దేశాల మధ్య కుదిరిన ఏకాభిప్రాయం మేరకు ఇరు దేశాలు ఈ మేరకు నిర్ణయం తీసుకున్నట్లు తెలుస్తోంది. అయితే.. ఈ అంశంపై భారత్‌ వైపు నుంచి అధికారిక ప్రకటన ఇంకా రావలసి ఉంది. గత ఏడాది 2020, మే నెల నుంచి లడఖ్ సరిహద్దు వెంట భారత్, చైనా దేశాలకు చెందిన సైనిక బలగాల మధ్య ఘర్షణాత్మక వాతావరణం నెలకొన్న విషయం తెలిసిందే. ఇక ఇటీవలే గల్వాన్ లోయలో చోటు చేసుకున్న ఘర్షణల్లో కల్నల్ సంతోశ్ బాబు సహా 20 మంది భారత జవాన్లు అమరులయ్యారనే సంగతి అందరికీ తెలిసిందే. అలాగే చైనా వైపున కూడా నష్టం అంతకుమించి రెట్టింపు స్థాయిలోనే జరిగినట్లు అంతర్జాతీయ మీడియా ప్రధానంగా పేర్కొంది. అయితే.. డ్రాగన్ కంట్రీ చైనా మాత్రం ఇప్పటివరకూ ఈ విషయమై అసలు నోరు మెదపకపోవటం విశేషం.