మరీ ముఖ్యంగా ఫిబ్రవరి 18న దేశవ్యాప్తంగా రైల్‌ రోకో కార్యక్రమాన్ని చాలా ప్రతిష్టాత్మకంగా నిర్వహించాలని పిలుపునిచ్చారు. ఆ రోజు మధ్యాహ్నం 12 గంటల నుంచి సాయంత్రం 4 గంటల వరకు నాలుగు గంటల పాటు దేశవ్యాప్తంగా రైళ్లను అడ్డుకోవాలని సంయుక్త కిసాన్‌ మోర్చా (ఎస్‌కేఎం) బుధవారం (ఫిబ్రవరి 10) ఒక ప్రకటన విడుదల చేసింది. జనవరి 26, గణతంత్ర దినోత్సవం రోజున ఢిల్లీలో ట్రాక్టర్ల పరేడ్ సందర్భంగా పలు హింసాత్మక ఘటనలు చోటు చేసుకోవడం, తదనంతర పరిణామాల నేపథ్యంలో రైతుల ఆందోళన తగ్గుముఖం పట్టినట్లే కనిపించింది. కానీ మరలా ఉద్యమం క్రమక్రమంగా పుంజుకుంటుంది. ఇక ఇటీవలే హైవేల ముట్టడి కార్యక్రమాన్ని విజయవంతంగా నిర్వహించిన రైతు సంఘాల నేతలు తమ తదుపరి కార్యాచరణ ప్రణాళికను సిద్ధం చేశారు. ఇందుకోసం సింఘు సరిహద్దు వద్ద సమావేశమయ్యారు. ఈ సమావేశంలో ఫిబ్రవరి 12 నుంచి చేపట్టబోయే పలు నిరసన కార్యక్రమాల గురించి కీలక నిర్ణయాలు తీసుకున్నారు.